Kúni keshe Berdaq atındaǵı Qaraqalpaq mámleketlik universiteti rektorı A.Reymov Ózbekstan Respublikası Ilimler akademiyası V.I. Romanovskiy atındaǵı Matematika institutınıń direktorı, akademik, Ózbekstan Qaharmanı Sh.Ayupov penen ushırastı.

Universitet rektorı Axmed Reymov bul ushırasıwdı birge islesiwdegi náwbettegi qádem sıpatında joqarı bahaladı.

Ushırasıwda V.I. Romanovskiy atındaǵı Matematika institutınıń Qaraqalpaqstan aymaqlıq bóliminde akademik Sh.Ayupovtıń basshılıǵında maqsetli baǵdarlama tiykarında Qaraqalpaqstan Respublikası hám universitetimizdiń Matematika fakultetinde matematika tálimin rawajlandırıwda kólemli islerdiń barısı, xalıq aralıq ilimiy baylanıslar boyınsha alıp barılıp atırǵan jumıslar hám aldaǵı rejeler haqqında sáwbetlesiw bolıp ótti. Atap aytqanda, xalıq aralıq ilimiy baylanıslardı elede rawajlandırıw hám keńeytiw máselesi ortaǵa taslandı. Usı máseleniń unamlı bir sheshimi sıpatında «Rossiya Ilimler akademiyasınıń Vladikavkaz ilimiy orayı»nıń Federallıq ilimiy orayı, Ózbekstan Respublikası Ilimler Akademiyası V. I. Romanovskiy atındaǵı Matematika institutı hám Berdaq atındaǵı Qaraqalpaq mámleketlik universiteti ortasında strategiyalıq birge islesiw haqqındaǵı shártnamaǵa qol qoyıstı. Bul úsh tárepleme shártnama ilimiy, ilimiy-texnikalıq hám ilimiy bilimlendiriw tarawlarında strategiyalıq birge islesiwdi jolǵa qoyıw, ámeliy hám fundamentallıq matematika tarawlarında qániygeler, ilimiy hám ilimiy-pedagogikalıq kadrlar tayarlawdı támiyinlew, óz-ara paydalı xalıq aralıq baylanıslardı júzege keltiriw hám keńeytiwdi óz ishine aladı. Usı shártnama tiykarında óz-ara ilimiy-izertlew jumısları alıp barılatuǵın ilimiy baǵdarlar, ilimiy-izertlew alıp barıwda ilimiy izertlewshiler, professor-oqıtıwshılar, jas alımlar hám xızmetkerlerdiń stajirovkaların shólkemlestiriw, óz-ara ilimiy potenciallardan paydalanıw kózde tutılǵan. Sonday-aq, ilimiy-izertlewshiler, professor-oqıtıwshılar, ziyrek studentler hám magistrantlar qatnasıwında hár qıylı dárejedegi xalıq aralıq ilimiy hám ilimiy-ámeliy konferenciyalar, seminarlar, ámeliy shınıǵıwlar hám treningler ótkeriw ilajları belgilenip alındı.

Usınday xalıq aralıq shártnamalardıń dúziliwi universitetimizdiń Matematika fakultetiniń ilimiy hám ilimiy-pedagogikalıq potencialınıń elede kúsheyiwine, sonday-aq, professor-oqıtıwshılar, ziyrek studentler hám magistrantlarımızdıń ilimiy-izertlew jumıslarınıń keńeyiwine tiykar boladı.

Nurjanov B. O.

Ózbekstan Respublikası Ilimler Akademiyası

I. Romanovskiy atındaǵı Matematika

institutınıń Qaraqalpaqstan bóliminiń

úlken ilimiy xızmetkeri