2022-jıl 5-may kúni Qaraqalpaq mámleketlik universitetinde Rossiya Ilimler Akademiyası A.N.Severtsov atındaǵı Ekologiya hám evolyutsiya máshqalaları institutınıń direktor orınbasarı, topıraqlardıń ekologiyalıq funktsiyaların úyreniw laboratoriyasınıń baslıǵı, b.i.d. Gongalskiy Konstantin Bronislavovich hám kishi ilimiy xizmetkeri Degtyarev Maksim Igorevich qatnasında ilimiy seminar bolıp ótti. Seminarǵa Qaraqalpaq mámleket universiteti Biologiya fakultetiniń professor-oqıtıwshıları, doktorantlar, magistrantlar hám ziyrek talabaları qatnastı.
Ilimiy seminardı fakultet dekanı, b.i.d., professor Yakub Ametov alıp bardı. Miymanlar seminar qatnasıwshılarına institut iskerligi, olardıń ámeldegi laboratoriyaları, atap aytqanda, topıraq zoologiyası rawajlanıwın uyreniwshi laboratoriya haqqında sóylep berdi. Seminar aqırında qatnasıwshılar ózlerin qızıqtırǵan sorawlarına juwaplar aldı. Usı kúni Qaraqalpaq mámleketlik universiteti hám A.N.Severtsov atındaǵı Ekologiya hám evolyutsiya máshqalaları institutını arasında birge islesiw boyınsha shártnama imzalandı.
Sonı aytıp ótiw kerek, 3-4 may kúnleri Moskvalı ekolog alımlar Qaraqalpaq mámleketlik universiteti Biologiya fakulteti professor-oqıtıwshıları menen Moynaq rayonında jaylasqan «Korabller qoyımshılıǵı» ashıq aspan astındaǵı muzeyinde, Beruniy rayonında jaylasqan Tómengi Ámiwdárya mámleketlik biosfera rezervatında bolıp ilimiy-izertlew jumısların alıp bardı.
Rufiya Serimbetova
Qaraqalpaq mámleketlik universiteti
Ulıwma biologiya hám fiziologiya
kafedrası assistenti
