Orıngul Qdırbaeva 1925-jıl 8-martta Qaraózek rayonı jetinshi awılında tuwılǵan. 1945-jılda Shımbay oqıtıwshılar institutın tamamlaǵan. Ol miynet iskerligin pedagogika institutı tariyx kafedrası oqıtıwshısı retinde tamamlaǵannan keyin baslaǵan. “Tariyx oqıtıw metodikası” páninen sabaq beriw menen birge Nókis qalasındaǵı 17-mektepte bolıp ótken mámleket pedagogikalıq ámeliyatına basshılıq etti. Óz eliniń jámiyetlik turmısında belsendi qatnası, ana jurtı gúlleniwine úles qosqan O.Qdırbaeva 1948-jılı Nókis qalalıq Keńesine deputat etip saylandı. SSSR Joqarı Keńesine deputat etip 1950-1954, 1954–1958-jılları saylandı. O.Qdırbaeva Tashkent, Qazan, Kalinin universitetlerinde bilimin jetilistiriw kurslarında oqıǵan.

     1947-jıl avgusttan 1953-jılǵa shekem pedagogika institutınıń SSSR tariyxı kafedrasında oqıtıwshı bolıp islegen. 1953-jıldan 1956-jılǵa shekem SSSR Ilimler Akademiyası Aziya xalıqları institutınıń teoriyalıq aspiranturasın tamamlaǵan. 1956-jıl sentyabrden 1976-jılǵa shekem SSSR tariyxı kafedrasında úlken oqıtıwshı bolıp islep keldi. 1961-jıl 15-sentyabrde “Miynet húrmeti”, 1983-jıl 14-sentyabrde “Miynet eń húrmetlisi”, 1950-jıl 23-mayda “Miynettegi qaharmanlıǵı ushın” medalları menen sıylıqlanǵan. 1975-jıl 29-avgustta «QQASSRda xızmet kórsetken oqıtıwshı» ataǵına iye bolǵan. Bir neshe márte Ózbekstan SSR hám Qaraqalpaqstan ASSR Joqarı Keńesi Prezidiumınıń Húrmet jarlıqları menen sıylıqlanǵan.

    Orıngul Qdırbaeva oqıtıwshı, pedagog sıpatında óz shákirtlerine bilim beriwde, ómir soqpaqlarına baǵdarlawda óz másláhát hám ibratı menen jóneltirdi. Orıngul apa máńgi yadımızda alǵısqa ılayıq hayal, pedagog insan sıpatında qalıwı sózsiz.