Fizika-matematika ilimleriniń kandidatı, professor Otarov Amanbay 1939-jılı 10-mayda Qońırat rayonında tuwılǵan. Ol 1963-jılı Qaraqalpaq mámleketlik pedagogikalıq institutın “Matematika hám sızıw” qánigeligin tamamladı. 1966-1974-jılları Kiev universitetiniń kibernitika fakultetiniń “Esaplaw matematikası” kafedrasında aspiranturada oqıdı. 1974-jılı Kiev universitetiniń kibernetika fakultetiniń qánigelestirilgen ilimiy keńesiniń májilisinde «О проекционно-дифференциальном методе решения уравнений и его применение к задачам изгиба пластин переменный жесткости» degen temada kandidatlıq dissertaciyasın tabıslı jaqladı.

   A.Otarovqa 1983-jılı docent, al 1992-jılı “Esaplaw matematikası” kafedrası boyınsha professor ilimiy ataqları, al 1993-jılı “Qaraqalpaqstan Respublikasına miyneti singen ilim ǵayratkeri” húrmetli ataǵı berildi. Sol 1989-1997 jılları universitettiń ilimiy isleri boyınsha prorektorı, ekonomika hám matematika fakultetleriniń dekanı lawazımlarında tabıslı jumıs isledi. Professor A.Otarov 150 den artıq ilimiy miynetleri 1 oqıw qollanba, 2 sabaqlıq qollanbaları baspadan shıqtı. Professor A.Otarov universitettiń ilimiy isleri boyınsha prorektorı lawazımında jumıs islegen dáwirinde ilimiy-izertlew jumıslarınıń tez pát penen rawajlanıwına, olardıń kóleminiń keńeyiwine hám ilimiy-pedagogikalıq kadrlardı kóplep tayarlaw jumıslarına salmaqlı úles qostı. Onıń baslaması menen universitette 1992-jılı Qaraqalpaq filologiyası boyınsha kandidatlıq dissertaciya, al, 1993-jılı doktorlıq dissertaciya jaqlaytuǵın qánigelestirilgen ilimiy keńesler ashıldı. Bul Qaraqalpaqstan iliminiń tariyxında eń iri waqıyalardıń biri boldı.

   Ol ulıwma bilim beretuǵın mekteplerge hám orta arnawlı oqıw orınlarına arnalǵan «Informatika hám esaplaw texnikasınıń tiykarları», «Informatikanıń hám esaplaw texnikasınıń tiykarların úyreniw» hám basqa da oqıw quralların rus hám ózbek tillerinen qaraqalpaq tiline awdarıp, Qaraqalpaqstanda xalıq bilimlendiriw sistemasınıń da rawajlanıwına óziniń salmaqlı úlesin qostı. Amanbay Otarov qay jerde, qanday lawazımda islemesin, óziniń shólkemlestiriwshilik uqıbı, miynet súygishligi, talapshańlıǵı menen kózge túsip, kásiplesleri hám student-jaslar arasında úlken abırayǵa eristi. Haq kewil insan, kishi peyil, tereń bilimli ustaz Amanbay Otarov barlıǵımızdıń yadımızda mángi saqlanadı. Ustazdıń keyingi ómiri ózi miyras qaldırǵan miynetlerinde jasaydı.

V.Erejepova Matematika fakulteti metodisti: