Berdaq atındaǵı Qaraqalpaq mámleketlik universiteti Biologiya fakulteti professor-oqıtıwshıları Qońırat rayonı XBBne qaraslı 1-2 sanlı ulıwma bilim beriw mekteplerinde bolıp, mektep oqıtıwshıları hám mektep pitkeriwshileri  menen ushırastı. Ózbekstan Respublikası Prezidenti Sh.Mirziyoyev tárepinen 2022-jıl 5-aprel kúni xalıq bilimlendiriw tarawında ámelge asırılıp atırılǵan reformalardıń nátiyjeliligin arttırıw boyınsha videoselektor májilisinde berilgen tapsırmalardıń orınlanıwı, sonday-aq mektep muǵallimlerin jańa metodika tiykarında qayta tayarlaw bolıp esaplanadı.

Ushırasıwda «Ulıwma biologiya hám fiziologiya» kafedra oqıtıwshılarınan V.Davletmuratova shıǵıp sóylep, pitkeriwshi joqarı klass oqıwshılarına Qaraqalpaq màmleketlik universiteti hám Biologiya fakulteti boyınsha keńnen maǵlıwmat berip ótti. G.Begdullaeva mektep muǵallimlerine jańa metodikalar haqqında maǵlıwmatlar berdi. Sonıń menen bir qatarda fakultet oqıtıwshısı A.Jangabaev shıǵıp sóylep pitkeriwshi klass oqıwshılarına joqarı oqıw orınlarına kiriw imtixanları haqqında qısqasha túsinik berdi. «Ekologiya hám qorshaǵan ortalıqtı qorǵaw» kafedrası oqıtıwshısı A.Kıdırbaeva hám magistrant A.Qairbaev mektep muǵallimlerine “Camridge” tálim sisteması haqqında keńnen túsinik berip ótti. Bul ushırasıw mektep oqıwshılarında úlken qızıǵıwshılıq payda etip, hár biriniń kewilinde student bolıw úmitin oyattı.