Jańa Qubla Uels universitetiniń (Sidney, Avstraliya) professorı Fyodor Anatolevich Sukochev 2022-jıl 18-maydan baslap Berdaq atındaǵı Qaraqalpaq mámleketlik universitetiniń ziyrek studentleri hám magistrantları, sonday-aq, V.I.Romanovskiy atındaǵı Matematika institutınıń Qaraqalpaqstan bóliminiń kishi ilimiy xızmetkerleri ushın «Quantitative estimates for the functional calculus on the Schatten p-classes» temasında onlayn-lekciyalar ótip basladı. F.A.Sukochev – pánler aralıq quramalı máselelerge jańasha analitikalıq jantasıwlardı izlew boyınsha dúnyada jetekshi qánige bolıp esaplanadı. Onıń izertlewleri kvantlıq mexanikadan ilhámlanǵan matematika tarawın qamtıydı, bunda kommutativlik ózgeriwshiler kommutativlik emesleri menen almastırıladı. Ol bir-biri menen baylanıslı, sonıń menen birge, hár qıylı bolǵan tarawlar, yaǵnıy kommutativlik emes analiz, kommutativlik emes geometriya hám kommutativlik emes itimallıq tarawları boyınsha xalıq aralıq tán alınǵan ekspert. Professor F.A.Sukochev Avstraliya ilimler akademiyası, Avstraliya matematikalıq jámiyeti hám Xannan medalı komitetiniń aǵzası (Avstraliya ilimler akademiyası), ARC (Australian Research Council) stipendiyasınıń laureatı, Stiltes professorı hám DORA (Discovery Excellent Researcher Award, ARC) sıylıǵınıń iyesi. Ol kóplegen jetekshi xalıq aralıq jurnallardıń, atap aytqanda, Journal of Functional Analysis, Duke Mathematical Journal, Advances in Mathematics, Mathematische Annalen hám basqa da kóplegen matematikalıq jurnallardıń recenzenti boldı. Ol sonıń menen birge ARC, New Zealand’s Marsden Fund and South Africa’s National Research Foundation (NRF) hám Qazaqstannıń ilim hám texnologiyalardı bahalaw milliy orayı sıyaqlı bir qansha milliy hám xalıq aralıq qarjı agentlikleriniń sholıwshısı boldı. Avstraliyanıń ilim-izertlew jurnalı hár jılı milliy ilim-izertlewdiń 250 tańlanǵan baǵdarları boyınsha jetekshi izertlewshiler hám eń jaqsı ilimiy intstitutlardıń dizimin járiyalaydı. Bul dizim sońǵı 5 jıl dawamında hár bir taraw boyınsha eń jaqsı 20 jurnalda baspadan shıqqan maqalalarǵa berilgen siltemelerdiń sanına tiykarlanadı. 2021-jıl ushın professor F.A.Sukochev «Matematikalıq analiz» tarawındaǵı Avstraliyanıń jetekshi matematik izertlewshisi dep tán alındı. Házirgi waqıtta F.A.Sukochev dúnyada tán alınǵan bilimlendiriw hám ilimiy-izertlew orayılarınıń biri bolǵan Jańa Qubla Uels universitetiniń professorı. Abıraylı QS World University Rankings reytingine sáykes bul universitet dúnyadaǵı eń jaqsı 50 joqarı oqıw orınlarınıń dizimine kiredi. Ol sonday-aq Positivity hám Banach Journal of Mathematical Analysis sıyaqlı iri xalıq aralıq jurnallardıń redakciyalıq keńesiniń aǵzası esaplanadı. nlayn-lekciyaǵa qatnasıwshılar belgili alım menen kommutativlik emes esaplawlardıń júdá qızıqlı hám mazmunlı maǵlıwmatları menen bayıtılǵan naǵız akademiyalıq onlayn baylanıstıń gúwası boldı. Bunday onlayn-lekciyalar hár dayım tıńlawshılardıń úlken qızıǵıwshılıǵın oyatadı hám olarǵa kóplegen kerekli jáne paydalı maǵlıwmatlar bere aladı dep úmittemiz.
B.O. Nurjanov
V. I. Romanovskiy atındaǵı Matematika institutınıń Qaraqalpaqstan bóliminiń úlken ilimiy xızmetkeri
