Aldın xabar bergenimizdey búgin Berdaq atındaǵı Qaraqalpaq mámleketlik universitetinde «Ózbekstan Respublikasında Korrupciyaǵa qarsı gúresiwge qaratılǵan reformalar» temasında seminar bolıp ótti. Seminardı universitet rektorı A.Reymov ashıp berdi hám alıp bardı. Eń dáslep universitet rektorı seminar qatnasıwshıların hám miymanlardı Qaraqalpaqstan Respublikası Prokuraturası hám Berdaq atındaǵı Qaraqalpaq mámleketlik universiteti menen birgelikte “Jaslar-korrupciyasız keleshek tárepdarları!” atamasında ótkerilgen suwretlew óneri tańlawı qatnasıwshılar tárepinen dóretilgen kórgizbeler menen tanıstırıp, bul kórgizbeler seminar qatnasıwshılarında hám kelgen miymanlarda ózgeshe tásir qaldırdı.
Seminarǵa Qaraqalpaqstan Respublikası prokurorınıń birinshi orınbasarı S.Imatov, Bas prokuraturanıń Korrupciyaǵa qarsı gúresiw tarawındaǵı is-ilajlardı muwapıwlastırıw basqarmas baslıǵı orınbasarı Sh.Muxamatov, Ádilik ministri orınbasarı E.Tursunovlar sózge shıǵıp, búgingi kúnde mámleketimizde Korrupciyaǵa qarsı gúresiw baǵdarında ámelge asırlıp atırılǵan reformalar, Korrupciyanıń hár qanday mámleket hám jámiyettiń siyasiy ekonmikalıq rawajlanıwına keri tásirin kórsetetuǵınlıǵın arnawlı slaydlarda kórsetip ótti. Bunday jamman illetke qarsı gúresiw maqsetinde kóplep nızam hújjetler qabıl etilip, bir qansha ilajlar ámelge asırılıp atırılǵanlıǵın boyınsha óz bayanatlarında keltirip ótti. Bunnan soń universitet rektorı korrupciyaǵa qarsı gúresiw baǵdarında mámleket siyasatınıń nátiyjeli ámelge asırılıwı korrupciyanıń sebepleri hám onıń aldın alıw boyınsha jańa sistemalı is-ilajlar kóriw maqsetinde, Berdaq atındagı Qaraqalpaq mámleketlik universitetinde de bir qansha jumıslar alıp barılıp atırılǵanlıǵı haqqında aytıp ótti. Sonǵı waqıtlarda jınayatshılıqqa qarsı gúresiw, korrupciya hám huqıqbuzarlıqlardın aldın alıwǵa qaratılǵan is-ilajlardı jetilistiriw jumıslarına da ayrıqsha itibar qaratılıp, bunday unamsız halatlarǵa jol qoymaw maqsetinde universitet kóleminde, “Korrupciyasız tarawdı rawajlandırıw boyınsha kompleks is-ilajlar” rejesi tiykarında universitet “QMU Pozitiv psixologi” telegramm kanalında universitet psixologı tárepinen sociallıq sorawnamalar turaqlı ráwishte ótkerilip kiyatırǵanlıǵın aytıp ótti.
Sonday-aq seminar juwmaǵında Qaraqalpaqstan Respublikası Prokuraturası hám Berdaq atındaǵı Qaraqalpaq mámleketlik universiteti tárepinen “Jaslar-korrupciyasız keleshek tárepdarları!” atamasında ótkerilgen súwretlew óneri tańlawı jeńimpazların sıylıqlaw máresmi ótkerildi.
Tańlawda nátiyjesine bola;
1-orındı universitetimizdiń Kórkem óner fakulteti 3-kurs studenti F.Muratbaev,
2-orındı Kórkem óner fakulteti 2-kurs I.Umirbaev,
3-orındı Kórkem óner fakulteti 3-kurs studenti A.Aytmuratovlar jeńip alıwǵa miyasar boldı. Bunnan tısqarı tańlawda belsendilik kórsetken studentler,
«Eń jaqsı plakat» nominaciyası boyınsha Kórkem óner fakulteti 2-kurs studenti G.Jolımbetova,
«Eń jaqsı reńli suwret» nominaciyası boyınsha Kórkem óner fakulteti 3-kurs studenti B,Saribaev,
«Eń jaqsı grafikalıq shıǵarma» nominaciyası boyınsha Kórkem óner fakulteti 2-kurs studenti A.Allambergenovlar sıylıqlandı. Korrupciyaǵa qarsı gúresiw baǵdarında óziniń dóretiwshilik jumısların kórsetken student-jaslarǵa Respublika prokurorınıń alǵısnamaları hám sawǵaları menen sıylıqlandı.
Sonday-aq Respublika prokuraturası tárepinen universitet kitapxanasına sawǵa sıpatında bir qansha kitaplar toplamı tapsırıldı. Seminardı ótkeriwden tiykarǵı maqset «Ózbekstan Respublikasında Korrupciyaǵa qarsı gúresiwge qaratılǵan reformalar» haqqında maǵlıwmatqa iye bolıw, solar qatarı korrupciyaǵa qarsı gúresiwge qaratılǵan mámleketlik siyasat, kúsheyttirilgen jınayiy juwapkershilik, korrupcion xabarlarǵa berilip atırılǵan xoshametler, tarawdaǵı ashıq-áshkaralıq hám mámleketlik dásturlerdiń orınlanıwı haqqında keń jámiyetshilikke maǵlıwmatlar beriw bolıp tabıladı.
