Ózbekstan Respublikası Joqarı hám orta arnawlı bilimlendiriw ministriniń 2022-jıl 16-may kúngi «Joqarı oqıw orınları málimleme-resurs orayları jumısın rawajlandırıw hám xızmetkerler miynetin múnásip bahalaw haqında»ǵı 172-sanlı buyrıǵı qabıl etildi. Buyrıqta usı jıldıń 18-21-may kúnleri kitapqumarlıqtı en jaydırıw boyınsha bir qatar ilájlar (ushırasıwlar, sáwbetlesiwler, kitap kórgizbelerin) shólkemlestiriw, málimleme-resurs oraylarında jumıs alıp barǵan, házirgi kúnde napaqada bolǵan sociallıq qorǵawǵa mútáj xızmetkerler hal-jaǵdayınan xabar alıw, sonday-aq, málimleme-resurs orayında kóp jıllıq miyneti hám málimleme-kitapxana tarawın rawajlandırıwǵa qosqan úlesleri ushın bir qatar xızmetkerlerdi joqarı oqıw orınları húrmet jarlıqları menen sıylıqlaw belgilep berilgen.
Usı buyrıqqa tiykarlanıp, sonday-aq, «21-may-kitapxanashılar kúni» ne arnap universitet málimleme-resurs orayında ushırasıw keshesi bolıp ótti. Keshege universitet oqıw isleri boyınsha prorektor O.Duysenbaev, finans hám ekonomika isleri boyınsha prorektor A.Qudaybergenov, kásiplik awqamı komiteti baslıǵı A.Allayarov, universitet jaslar menen islesiw hám ruwxıy-aǵartıwshılıq isleri bólimi baslıǵı Q.Beknazarovlar qatnasıp bayram menen qutlıqladı hám málimleme-resurs orayında kóp jıllıq miyneti hám málimleme-kitapxana tarawın rawajlandırıwǵa qosqan úlesleri ushın bir qatar xızmetkerlerge húrmet jarlıǵı hám sawǵalar tapsırdı.
