Búgin Berdaq atındaǵı Qaraqalpaq mámleketlik universitetinde 26-iyun – «Xalıqaralıq náshebentlikke qarsı gúresiw» kúni múnásibeti menen «Biz náshebentlikke qarsımız» atamasında student-jaslar arasında profilaktikalıq úgit-násiyatlaw ilajı ótkerildi.
Ilajda Qaraqalpaqtan Respublikası Ishki isler ministrligi Tergew basqarması bólim baslıq Podpolkovnik S.Nuradinov, Nókis qalası «Muxammed Baxiy iyshan» jome meshiti imam xatibi Sh.Kudaybergenov, Nókis qalalıq IIO JMB JXXB baslıǵı podpolkovnik E.Musagaliev, Nókis qalalıq IIO JMB orınbasarı podpolkovnik A.Tilewmuratov, №1 RPND psixiatr-norkolog shıpakeri M.Naǵmetova hám student-jaslar qatnastı.
Ilajdı universitet jaslar máseleleri, ruwxıylıq hám aǵartıwshılıq isleri boyınsha prorektor S.Alawatdinov ashtı hám alıp bardı. S.Alawatdinov ilajdıń tiykarǵı maqseti jaslar arasında narkotik zatlardıń tarqalıwına qarsı gúresiw hám aldın alıw, bul jaman illet boyınsha úgit-násiyat jumısların alıp barıw sonıń menen birge jaslarımızdı zárúr maǵlıwmatlar menen tanıstırıp barıw búgingi kúnniń áhmiyetli wazıypası ekenligin atap ótti. Sonday-aq, ilajda taraw qánigeleri tárepinen jaslar arasında narkotik zatlarınıń tarqalıwına qarsı gúresiw, jaslardıń náshebentlikke berilmewi, narkotik zatlarınıń zıyanlı, ayanıshlı hám awır aqıbetleri, bunday illetke qarsı bárshe jaslar birgelikte gúresiwleri lazım ekenligi, sonday-aq, bul jaman illettiń aldın alıw maqsetinde Respublika jasları salamatlıǵın kúsheytiw, bárkamal insan etip tárbiyalawǵa qaratılǵan ilajlar hám hár túrli sport túrlerinen jarıslar ótkeriliwin, jaslardıń sport sekciyalarına bekitiliwin, olardıń bos waqıtların mazmunlı ótkeriliwi haqqında ayrıqsha atap ótildi.
Ilaj sońında náshebentlik zatlarǵa qarsı gúresiwdi úgit-násiyatlawǵa qaratılǵan bukletler jaslarǵa tarqatıldı. Studentler ózleriniń qızıqtırǵan sorawlarına tiyisli juwaplar aldı.
