Usı jıldıń 9-10-iyun kúnleri Turkiyanıń Izmir qalasında Ózbekstan-Turkiya joqarı oqıw orınları forumı bolıp ótti. Forumda texnik hám injenerlik tarawında kadrlar tayarlaytuǵın 20 dan artıq joqarı oqıw orınları rektorları, prorektorları hám ministrlik juwaplı xızmetkerlerinen ibarat delegaciya qatnastı. Ózbekstan-Turkiya joqarı oqıw orınları forumında Qaraqalpaqstan Respublikasınan Berdaq atındaǵı Qaraqalpaq mámleketlik universitetiniń rektorı A.Reymov basshılıǵındaǵı delegaciya aǵzaları qatnastı.
Forum sheńberinde Turkiyanıń bir neshe universitetleri menen Berdaq atındaǵı Qaraqalpaq mámleketlik universiteti arasında xalıq aralıq birge islesiw boyınsha memorandumlarǵa qol qoyıstı.
‑Turkiyanıń Burdur Mehmet Akif Ersoy universiteti rektorı Adem Korkmaz penen Berdaq atındaǵı Qaraqalpaq mámleketlik universiteti rektorı A.Reymovlar eki universitet arasında xalıq aralıq birge islesiw boyınsha shártnamaǵa qol qoyıstı.
‑Turkiyanıń Usak universiteti rektorı professor Ekrem Savas hám Berdaq atındaǵı Qaraqalpaq mámleketlik universiteti rektorı professor A.Reymovlar eki universitet arasında xalıq aralıq birge islesiw, mevlana joybarı boyınsha shártnamaǵa qol qoyıstı. Bul shártnamada professor oqıtıwshılar hám studentlerdiń belgilengen qánigelik boyınsha tájiriybe almasıwı kózde tutılǵan.
‑Turkiyanıń Sakarya universiteti rektor Fatih Savasan hám Berdaq atındaǵı Qaraqalpaq mámleketlik universiteti rektorı Axmed Reymovlar eki universitet arasında xalıq aralıq birge islesiw boyınsha memorandumǵa qol qoyıstı.
Bul dúzilip atırılǵan memorandumnıń maqseti eki joqarı oqıw orınları arasında kórsetilgen jónelis boyınsha birge islesiwdi jolǵa qoyıw, sonday-aq, gumanitar, sociyallıq hám tabiyiy pánler boyınsha universitet xızmetkerleri hám oqıtıwshılardıń tájiriybe almasıwı kózde tutılǵan. Bunnan tısqarı, pedagog kadrlar tájiriybesin arttırıw kursların hám akademik ushırasıwlar, sonıń menen bir qatarda aldaǵı waqıtları simpoziumlar shólkemlestiriwdi jolǵa qoyıwdı maqset etken.
Sonday-aq, forumda Berdaq atındaǵı Qaraqalpaq mámleketlik universiteti oqıw isleri boyınsha prorektorı O.Duysenbaev penen Turkiyanıń Еge universiteti Texnikumı menen xalıq aralıq birge islesiwdi elde jaqsılaw hám qospa tálimdi jolǵa qoyıw máseleleri kelisip alındı.
Sonıń menen birqatarda prorektorı O.Duysenbaev Еge universitetiniń jurnalistika fakultetinde bolıp, ol jerde alıp barılıp atırılǵan jumıslar menen tanıstı.
QMU Baspasóz xızmeti.
