Búgin Berdaq atındaǵı Qaraqalpaq mámleketlik universiteti hám Ózbekstan Respublikası Oliy Majlis Senatı janındaǵı Jaslar parlamenti menen birgelikte «Konstituciyalıq reformalardı ámelge asırıwda jaslar huqıqların bekkemlew» atamasında sáwbetlesiw bolıp ótti.
Ushırasıwdı universitet Jaslar menen islesiw, ruwxıylıq hám aǵartıwshılıq bólimi baslıǵı Q.Beknazarov ashıp berdi hám alıp bardı. Bunnan soń, Ózbekstan Respublikası Oliy Majlis Senatı janındaǵı Jaslar parlamenti baslıǵı orınbasarı S.Maxmudova Ózbekstan Respublikası Konstituciyasınıń tariyxı, jaslarǵa tiyisli mámleketlik siyasattıń nátiyjeligi haqqında maǵlıwmat berip ótti.
Sonday-aq, Ózbekstan Jaslar isleri agentligi Qaraqalpaqstan Respublikası basqarmas qániygesi, Oliy Majlis Senatı janındaǵı Jaslar parlamentiniń Qaraqalpaqstandaǵı wákili Q.Seytekov shıqtı hám ol óz sózinde jaslardıń parlamenttegi ornı, siyasiy ilajlardaǵı qatnası hám mámleketlik reformalardı ámelge asırıwda jaslar pikirlerin bildiriw boyınsha shólkemlestirilgen Oliy Majlistiń joqarı palatasındaǵı Jaslar parlamenti jumısları haqqında túsinikler berip ótti. Sonıń menen birqatrda Mámleketimiz tárepienen jaslar ushın jaratılıp atırılǵan imkaniyatlar boyınsha Ózbekstan Respublikası Xalıq bilimlendiriw ministrligi janındaǵı respublika «Barkamal áwlad» balalar mektebi direktorınıń birinshi orınbasarı E.Akbarov óziniń pikirlerin bayan etti. Sonday-aq, ilajda respublika «Barkamal áwlad» balalar mektebi direktorı orınbasarı L.Xurshimov 2022-jıl 20-may kúngi Ózbekstan Respublikası Oliy Majlis Senat Keńesi hám Nızamshılıq palatası Keńesiniń qospa májilisindegi Ózbekstan Respublikası Konstituciyasına ózgeris hám qosımshalar kirgiziwge qaratılǵan wazıypalar haqqında túsinikler berdi.
Ushırasıwda universitetimizdiń Fizika fakulteti student-jaslarınıń Konstituciyaǵa ózgeris hám qosımshalar kirgiziw boyınsha pikirleri tıńlandı. Bunda jaslar tárepinen korrupciyaǵa qarsı gúresiw boyınsha ilajlar haqqında, medicinalıq xızmetti jetilistiriw, bilimlendiriw tarawında jańa reformalardı engiziwge qaratılǵan nızamlarǵa qosımshalar kirgiziw boyınsha usınıslar berildi. Ótkerilgen ilajda iyun-iyul ayları dawamında Konstituciyalıq reformalardı ámelge asırıwda jaslardıń ornın hám belsendiligin asırıw boyınsha wazıypalar belgilep alındı.
