Ózbekstan Respublikası hám Belarus Respublikası arasında kóplegen tarawlar boyınsha birge islesiwler, sonıń ishinde bilimlendiriw tarawı boyınshada bir qatar jumıslar ámelge asırılmaqta. İlim hám bilimlendiriw tarawındaǵı birge islesiwdi bekkemlew maqsetinde Universitetimiz rektorı A.Reymov basshılıǵındaǵı universitet delegaciyasınıń Belarus Respublikasına bolǵan saparın aytsaq boladı.
Usınday birge islesiwdiń nátiyjesi retinde 2019-2020 oqıw jılınan baslap Qaraqalpaq mámleketlik universiteti hám Belorussiya mámleketlik texnologiya universiteti rektorları arasında dúzilgen shártnamaǵa tiykarlanıp, qospa bilimlendiriw dástúri (Doublee degree programm) tiykarında kadrlar tayarlaw boyınsha shólkemlestirilgen 5A320401 – Ximiyalıq texnologiya (islep shıǵarıw túrleri boyınsha) magistratura qánigeligine magistrler oqıwǵa qabıllandı. 2021/2022 oqıw jılınıń basınan baslap bul magistrler ózleriniń oqıwın Belorussiya mámleketlik texnologiya universitetinde dawam etti.
Magistrantlar oqıw rejede kórsetilgen pánlerdi tolıq ózlestirip, 2022-jıl 23- iyun kúni magistrlik dissertaciyasın ayırıqsha bahalarǵa tabıslı qorǵap shıqtı hám eki diplomǵa, yaǵnıy Qaraqalpaq mámleketlik universiteti hám Belorussiya mámleketlik texnologiya universitetleri diplomlarına iye boldı. Attestaciya komissiyası aǵzalıǵına Qaraqalpaq mámleketlik universitetinen fakultet dekanı B.Nurımbetov, kafedra baslıǵı B.Xojametova hám Ximiyalıq texnologiya kafedrası professor-oqıtıwshıları Zoom dástúri arqalı qatnastı. Attestaciya komissiyası aǵzaları tárepinen magistrlerimiz óz ilimiy jumısların joqarı dárejede orınlaǵanı aytılıp ótildi. Magistrlerde óz gezeginde Qaraqalpaq mámleketlik universiteti hám Belorussiya mámleketlik texnologiya universitetleri rektoratlarına usınday imkaniyatlardı jaratıp bergeni ushın ózleriniń sheksiz minnetdarshılıǵın bildirdi. Dissertaciyasın tabıslı qorǵap shıqqan magistrlerge bálent párwazlar tileymiz.
Ǵ.Sultanov
Ximiya-texnologiya fakulteti dekan orınbasarı
