2022-jıl 20-may kúngi Ózbekstan Respublikası Oliy Majlis Senat Keńesi hám Nızamshılıq palatasınıń qospa májilisinde Ózbekstan Respublikası Konstituciyasına ózgeris hám qosımshalar kirgiziw boyınsha mákeme, shólkemler hám xalıq arasında taraw xızmetkerleri menen ushırasıwlar ótkeriw hám Konstituciyamızǵa ózgeris hám qosımshalar kirgiziw boyınsha keń jámáátshiliktiń pikir hám usınısların tıńlaw belgilengen.
Usı tiykarda 2022-jıl 24-iyun kúni Dene mádeniyatı fakultetinde Ózbekstan Respublikası Konstituciyasına ózgeris hám qosımshalar kirgiziw boyınsha ushırasıw ótkerildi. Ushırasıwǵa Dene mádeniyatı fakulteti dekanı N.Kaypov, Jınayıy – huqıqıy hám puqaralıq huqıqıy pánler kafedrası assistenti B.Ermekbaev, Dene mádeniyatı teoriyası hám metodikası kafedrası úlken oqıtıwshıları J.Turdımuratov, N.Akimov, dene mádeniyatı fakulteti dekan orınbasarları, kafedra baslıqları hám professor-oqıtıwshıları qatnastı. Ushırasıwda bayanatshılar Ózbekstan Respublikası Konstituciyasına ózgeris hám qosımshalar kirgiziw boyınsha 2022-jıl 20-may kúni Oliy Majlis Senatı Keńesi hám Nızamshılıq palatasınıń qospa májilisinde Konstituciyalıq komissiya quramı dúzilgenligi, konstituciyaǵa kiritiletuǵın ózgerisler «insan-jámiyet-mámleket» principine tiykarlanǵan bolıp, bul milliy Konstituciyalıq ózlikti sáwlelendiriwi hám ámeldegi Konstituciyanıń barlıq bólimlerine túp-tiykarınan ózgerisler kiritiliwi názerde tutılatuǵınlıǵı, ámeldegi konstituciyamızdıń barlıq bapları hám bólimleri, konstituciyamız qabıl etilgennen baslap búgingi kúnge shekem neshe márte ózgeris hám qosımshalar kiritilgenligi, sonday-aq, nızamda belgilengen normativ-huqıqıy hújjetler, puqaralardıń kepillengen huqıqları haqqında turmıslıq mıssallar keltirgen halda ushırasıw qatnasıwshıların tanıstırıp ótti.
Ushırasıw dawamında qatnasıwshılar ózleriniń qızıqtırǵan sorawlarına tiyisli juwaplar aldı hám konstituciyaǵa ózgeris hám qosımshalar kirgiziw boyınsha óz pikir, usınısların bildirdi.
Ótkerilgen ushırasıwdıń tiykarǵı maqseti házirgi waqıtta Respublika kóleminde barlıq mekemeler, shólkemler hám puqaralardan Konstituciyanıń barlıq bapları hám bólimlerine ózgerisler kirgiziw boyınsha usınıslar alınıp atırǵanlıǵı, bul boyınsha Dene mádeniyatı fakulteti jámááti de óz usınısların universitet basshılıǵına usınıs etiw bolıp tabıladı.
R.Óteniyazov
Dene mádeniyatı fakultetiniń
jaslar menen islesiӯ boyınsha dekan orınbasarı
