Paytaxtımızdaǵı Qaraqalpaqstan kórkem óner sarayında 30-iyun-Jaslar kúni múnásibeti menen Qaraqalpaqstan Respublikası Joqarǵı Keńesiniń Baslıǵı M.Kamalovtıń respublikamız jasları menen ushırasıwı bolıp ótti.

Ushırasıwda Joqarǵı Keńes Baslıǵı M.Kamalov sózge shıǵıp barlıq jaslardı Jaslar kúni menen qızǵın qutlıqladı. Onnan soń Qaraqalpaqstan Respublikasında túrli tarawlarda belsendilik kórsetip atırǵan bir topar jaslar, solar qatarında Berdaq atındaǵı Qaraqalpaq mámleketlik universiteti studentleri Akmal Srajatdinov, Nurbek Tojimurodov, Aydana Allambergenova ham Ayjamal Qalıbaevalar «Úmit ushqını» kókirek nıshanı menen sıylıqlandı. Sonıń menen bir qatarda Qaraqalpaq filologiyası hám jurnalistika fakultetiniń 3-kurs studenti, Nawayı atındaǵı mámleketlik stipendiya iyesi, «Bookie» qaraqalpaq tilindegi audiokitaplar platformasınıń tiykarın salıwshısı Azizbek Dabılov hám “Zulfiya” atındaǵı mámleketlik sıylıqtıń iyesi Zuxraxon Maqsadova Joqarǵı Keńestiń arnawlı «Minnetdarshılıq xatı» menen sıylıqlandı.

Sonday-aq ushırasıw dawamında jaslar Joqarǵı Keńes Baslıǵına óz usınısların hám minnetdarshılıqların bildirdi. «Úmit ushqını» kókirek nıshanı menen sıylıqlanǵan Ayjamal Qalıbaeva Qaraqalpaqstan Respublikasında jas jurnalist hám reportyorlardı tayarlaw boyınsha Media oray ashıwdı usınıs etti hám Joqarǵı Keńes Baslıǵı bul usınıstı qollap quwatladı. «Media oray ashıladı, onıń saltanatlı ashılıwında men Siz jaslar menen birge qatnasaman»-dedi M.Kamalov