Búgin Berdaq atındaǵı Qaraqalpaq mámleketlik universitetinde «Aral apatshılıǵı aqıbetlerin insan salamatlıǵı hám biosferanı qorǵaw ushın ekologiyalıq monitoring ótkeriw» atamasında professor Azat Matchanovtıń 70 jıllıq yubileyine baǵıshlanǵan xalıq aralıq ilimiy-teoriyalıq konferenciya bolıp ótti. Onda ilimpazlar, professor-oqıtıwshılar, nuraniylar, student-jaslar hám ǵalaba xabar qurallarınıń wákilleri qatnastı. Konferenciyanı universitetimizdiń rektorı Axmed Reymov ashıp berdi hám alıp bardı. A.Reymov óz sozinde Ózbekstan hám Qaraqalpaqstan xalıq bilimlendiriw aǵlası, Doslıq ordeniniń iyesi, belgili ustaz, biologiya ilimleriniń doktorı, professor Azat Matchanovtı Qaraqalpaqstanda biologiyanıń úlken tarawı esaplanǵan Fiziologiya ilimi boyınsha aldınǵı qatarda ilim jolı kárwanın baslap bergen hám doktorlıq dárejege, professorlıq ataqqa iye bolǵan jergilikli kadrlardan biri ekenligi, sonday-aq, Azat Matchanov biologiya ilimleriniń doktorı bolaman degenshe ilimniń iyne menen qudıq qazǵanday mashaqatlı jolların basıp ótkenin, ol Leningradta (házirgi Sankt-Peterburgte) Rossiya Ilimler akademiyasınıń I.P.Pavlov atındaǵı fiziologiya institutında stajer izleniwshi, aspirant, doktorant bolıp ilim jolınıń barlıq basqıshlarınan ótip, qanshadan qansha ilim jolındaǵı tosıqlardı márdana jeńip házirgi úlken alım dárejesine jetisken insan ekenligin aytıp otti.
Ol insannıń miynet jolına názer salıp, ápiwayı oqıtıwshıdan Qaraqalpaqstandaǵı eki úlken oqıw dárgayınıń (Ájiniyaz atındaǵı Nókis pedogogikalıq institutı hám Berdaq atındaǵı Qaraqalpaq mámleketlik universitetiniń) rektorı lawazımına shekemgi bolǵan mashaqatlı úlken joldı basıp ótkenligin hám ol Qarakalpaqstan Respublikasınıń barlıq joqarı orınlarında házirgi jumıs islep atırǵan kópishilik professor oqıtıwshılardıń jumıs islep qalıp ilimpaz dárejesine jetisiwine sebepshi bolǵan insan ekenligin óz bayanatında aytıp, Azat Taubaldievichti múbárek 70 jası menen qutlıqlap konferenciya jumıslarına tabıslar tiledi.
Konferenciyada Qaraqalpaqstan Respublikası Joqarǵı Keńesiniń Komitet baslıǵı D.Qurbaniyazov shıǵıp sóylep, yubiley múnásibeti menen Qaraqalpaqstan Respublikası Joqarǵı Keńesiniń qutlıqlawın oqıp esittirdi. Sonday-aq keshede Qaraqalpaqstan Respublikası Ministrler Keńesi baslıǵınıń húrmet jarlıǵı tapsırıldı. Bunnan soń, Konferenciyada Biologiya fakulteti dekenaı Ya.Ametov, Ózbekstan Respublikası Ilimler Akademiyası Qaraqalpaqstan bólimi direktorı M.Jumanov, Oliy Majlis depudatı M.Ibragimovlar búgingi sáne múnásibeti menen óz qutlıqlawların bildirdi. Sonıń menen birqatarda konferenciyaǵa Sırt ellerden Pyotr Zavyalov, Andrey Pugovkin hám Ózbekstan Milliy unuversitetinen Rano Qurbannazarovalar óz bayanatlar menen qatnastı. Ózbekstan hám Qaraqalpaqstan xalıq bilimlendiriw aǵlası, Doslıq ordeniniń iyesi, belgili ustaz, biologiya ilimleriniń doktorı, professor Azat Matchanov Qaraqalpaqstanda biologiyanıń úlken tarawı esaplanǵan Fiziologiya ilimi boyınsha aldınǵı qatarda ilim jolı kárwanın baslap bergen hám doktorlıq dárejege, professorlıq ataqqa iye bolǵan jergilikli kadrlardan esaplanadı.
Mámleketti – qúdiretli, milletti – ullı etetuǵın kúsh, bul – ilim-bilim, tálim hám tárbiya ekenligi dáliyl talap etilmeytuǵın haqıyqatlıq. Jańa Ózbekstanda ilim-bilimge itibar joqarı shıńǵa shıqtı desek asıra aytqan bolmaymız. «Aral apatshılıǵı aqıbetlerin insan salamatlıǵı hám biosferanı qorǵaw ushın ekologiyalıq monitoring ótkeriw» atamasındaǵı ótkerilgen xalıqaralıq ilimiy-teoriyalıq konferenciya, jetekshi pedagog, talantlı shólkemlestiriwshi, talapshań hám miyirman ustaz, óz isiniń haqıyqıy pidayısı bolǵan Azat Matchanovtı búgingi 70 jıllıq yubileyi menen universitetimiz jámááti atınan qızǵın qutlıqlaymız! Ustazǵa bekkem densawlıq, ilimiy-dóretiwshilik jumıslarında tabıslar tilep qalamız.
