Búgin Berdaq atındaǵı Qaraqalpaq mámleketlik universitetinde 2021/2022 oqıw jılında bakalavriat tálim baǵdarı boyınsha hám magistratura qániygeliklerin tabıslı tamamlap atırǵan pitkeriwshilerge diplom tapsırıw máresimi bolıp ótti. Onda universitetimizdiń professor-oqıtıwshıları barlıq pitkeriwshiler hám olardıń ata-anaları qatnastı. Dáslep universitetimiz rektorı A.Reymov sózge shıǵıp, búgingi kúnde mámleketimiz tárepinen jaslarǵa berilip atırılǵan imkaniyatlar jaslardı hár tárepleme qollap-quwatlaw, olardıń óz kásibiniń maman qániygesi bolıp jetilisiwi ushın barlıq shárt-shárayatlar jaratılǵanlıǵın hám pitkeriwshi studentlerge ustazlarınan alǵan bilim hám tájiriybelerin keleshekte mámleketimiz ǵárezsizligin bekkemlew, watanımızdıń rawajlanıwı, elimiz tınıshlıǵı, xalqımız párawanlıǵı jolında ayanbay xızmet etetuǵın jetik kadrlar bolıp jetilsiwine isenim bildirip olarǵa aldaǵı jumıslarında tabıslar tiledi.
Bunnan soń, universitetimizdiń Fizika-matematika ilimleriniń kandidatı, professor B.Abdikamalov sózge shıǵıp, barlıq pitkeriwshilerdi búgingi keshe menen qutlıqlap, olarǵa aldaǵı oqıwlarında hám jumıslarında bálent párwazlar tiledi. Sonıń menen bir qatarda pikeriwshilerdiń ata-anaları sózge shıǵıp, búgingi pitkeriwshilerdi hám usı dárgayda tálim-tárbiya berip atırǵan ustazlarına óz minnetdarshılıǵın bildirdi.
Sonday-aq, keshede universiteimizdiń 2021-2022 oqıw jılında bakalavriat tálim baǵdarı hám magistratura qániygelikleri boyınsha barlıq pitkeriwshilerge saltanatlı túrde diplomlar tapsırılıp, sonıń menen qatar stipendiyantlar, pán olimpiadalarında, túrli kórik-tańlawlarda joqarı orınlardı iyelegen studentlerge minnetdarshılıq hám olardıń ata-analarına universitetimiz rektorı atınan húrmet jarlıǵı tapsırıldı. Sonday-aq, keshe universitetimiz jámááti tárepinen tayarlanǵan koncert baǵdardlaması menen dawam etti.
QMU Baspasóz xızmeti
