Usı jıldıń 5-sentyabr kúni Berdaq atındaǵı Qaraqalpaq mámleketlik universitetiniń Dene mádeniyatı fakultetinde “Jańa Ózbekstanda el áziz, insan áziz!” uranı astında “Ǵárezsizlik sabaǵı” ótkerildi.
Ǵárezsizlik sabaqlarına fakultetimizdiń tájiriybeli professor-oqıtıwshıları biriktirilip, olar student-jaslarǵa Janajan Watanımız – Ózbekstan Respublikası óziniń mámleket ǵárezsizligin qolǵa kirgizgenine hám ǵárezsiz rawajlanıw jolın baslaǵanına 31 jıl tolǵanlıǵı, ǵárezsizlik xalqımız ushın óz táǵdiriniń haqıyqıy iyesi bolıp, qádir-qımbatın ańlap, múnásip turmıs keshiriw, elimizde huqıqıy demokratiyalıq mámleket hám puqaralıq jámiyetin qurıw múmkinshiligin jaratqanlıǵı, házirgi waqıtta ol hárbir insannıń ekonomikalıq, sociallıq tarawlarda talant hám qábiletin tolıq kórsete alıwı, huqıq hám erkinliklerin júzege shıǵarıwınıń bekkem tiykarı bolıp tabılatuǵınlıǵı, ǵárezsizlik jıllarında áyyemgi tariyxımız, bay miyraslarımız, milliy mámleketshiligimiz, muqaddes dinimiz, úrp-ádet hám dástúrlerimiz qayta tiklendi. Búgingi kúnde mehir-aqıbet, awızbirshilik sıyaqlı ullı pazıyletler, milliy hám ulıwma adamzatlıq qádiriyatlarǵa húrmet, sezimi júregimizdiń túp-túbinen orın alatuǵınlıǵın keńnen túsindirip ótti.
Sonday-aq, professor-oqıtıwshılar mámleketimiz ǵárezsizliginiń 31 jıllıǵın belgilew qarsańında, ótken dáwir dawamında basıp ótilgen qıyın jolımızǵa jáne bir márte názer taslaw, ǵárezsiz rawajlanıwımız dawamında ámelge asırılǵan isler, erisken nátiyjelerdi qalıs baxalaw, elimizde ámelge asırılıp atırǵan keń kólemli reformalar, ilim-pán, mádeniyat, sport, h.t.b. tarawlar boyınsha jaslarǵa jaratılıp atırǵan imkaniyatlar haqqında sabaq dawamında anıq pedagogikalıq tájiriybeleri arqalı jetkerip berdi.
M.Xalmuratov
Dene mádeniyatı teoriyası hám metodikası kafedrası stajyor-oqıtıwshısı
