Usı jıldıń 9-sentyabr kúni Dene mádeniyatı fakulteti 1-kurs studentleri menen «Jańa Ózbekstanda el áziz, insan áziz» uranı astında “Birinshi kurs mektebi” ilajları sheńberindegi ushırasıw ótkerildi. Ilajǵa fakultet dekanı N.Kaypov, jaslar menen islesiw boyınsha dekan orınbasarı R.Óteniyazov, oqıw isleri boyınsha dekan orınbasarı A.Nurjanov, hayal-qızlar máseleleri boyınsha dekan másláhátshisi G.Óskinbaeva, QMU «Finans» kafedrası docenti U.Aytmuratova, QMU profilaktika inspektorı I.Erejepov, QMU Hayal-qızları máseleleri boyınsha aǵa inspektorı R.Tasbaeva, tyutorlar hám 1-kurs studentler qatnastı. Ilajda bayanatshılar student bolıw baxtına miyassar bolǵan jaslardı Ǵárezsizligimizdiń 31 jıllıǵı menen universitet hám fakultet jámááti atınan qızǵın qutlıqlap, olarǵa universitet ádep-ikramlılıq kodeksi hám ishki-tártip qaǵıydaları, oqıw processi, studentlerge jaratılǵan shárayatlar, Prezidentimizdiń 2022-jıl 31-avgust kúngi «Qaraqalpaqstan Recpublikasında isbilermenlik, innovaciyalıq texnologiyalar hám infrastrukturalardı jedel rawajlandırıw arqalı xalıq párawanlıǵın arttırıwdıń qosımsha is-ilajları haqqında»ǵı PP-213-sanlı pármanınıń mazmunı hám áhmiyeti, student-jaslar arasında júz beriwi múmkin bolǵan jınayatshılıq hám huqıqbuzarlıqtıń aldın alıw, milletlerara tatıwlıq hám doslıqtı jáne de bekkemlew, sonday-aq, tınıshlıqtıń qádirine jetiw boyınsha túsinikler berip ótti. Ilaj dawamında student-jaslarǵa universitet turmısı haqqında hám tálim-tárbiyalıq mazmunǵa bay hám áhmiyetke iye bolǵan videorolikler qoyıp berildi. Sonday-aq, kúnniń ekinshi yarımında fakultetimiz tyutorları 1-kurs studentlerine universitet boylap sayaxat shólkemlestirip, olardı málimleme – resurs orayı, mádeniyat sarayı, sport sarayları hám maydanshaları, studentler turar jayları hám universitetimizdegi muzeyler menen menen tanıstırıldı. Ótkerilgen ilajdıń tiykarǵı maqseti 1-kurs studentlerdiń universitet turmısına beyimlesiwine kómeklesiw, olardı qabıl etilgen huqıqıy-normativ hújjetler menen tanıstırıw hám tálim-tárbiyanı úgit-násiyatlaw bolıp tabıladı.
R.Óteniyazov
Dene mádeniyatı fakultetiniń
jaslar menen islesiӯ boyınsha dekan orınbasarı
