Usı jıldıń 13-sentyabr kúni Turkiya mámleketi Izmir qalasında jaylasqan Ege universiteti Túrk dunyası Ilimiy-izertlew institutınıń docenti Ibraxim Shaxin mırza Qaraqalpaq Mámleketlik Universitetinde xızmet saparında boldı. Sapar dawamında I.Shaxin Berdaq atındaǵı Qaraqalpaq mámleketlik universitiniń oqıw isleri boyınsha prorektorı A.Duysenbaev penen ushırasıp, eki joqarı oqıw ornı arasındaǵı ilimiy baylanıslar boyınsha sáwbet ótkerildi.
Bunnan soń, Xúrmetli miyman universitettiń Ózbek filologiyası fakultetiniń professor-oqıtıwshıları menen ushırasıw ótkerdi. Ushırasıw dawamında shet el joqarı oqıw orınları menen ózara birge islesiwdi bekkemlew hám ilimiy qarım-qatınaslardı rawajlandırıw máqsetinde Turkiya mámleketiniń Ege universitetine qaraslı Túrk dunyası Ilimiy-izertlew institutı menen Qaraqalpaq mámleketlik universitetiniń Ózbek filologiyası fakulteti jámááti arasında memorandumǵa qol qoyıldı.
Memorandumda eki Joqarı oqıw ornı arasındaǵı ilimiy hám mádeniy baylanıslardı rawajlandırıw kózde tutılǵan. Usı memorandum eki JOO arasındaǵı ilimiy baylanıstı bekkemlew, professor-oqıtıwshılardıń qániygeligin jetilistiriw, doktorantlar hám magistrantlardıń ilimiy stajirovkadan ótiwi, ilimiy izertlew jumısların birge islew hám t.b. wazıypalardı óz ishine aladı.
Ushırasıw dawamında universitettiń Ózbek filologiyası fakulteti jámááti professor-oqıtıwshıları menen Ege universiteti Túrk dunyası Ilimiy-izertlew institutınıń profesor-oqıtıwshıları birgelikte házirgi túrkiy tilleri hám ádebiyatı boyınsha oqıwlıqlar, oqıw-metodikalıq qollanbalar tayarlaw, magistrantlardıń ilimiy-izertlew jumıslarına basshılıq etiw, ilimiy maqalalar járiyalaw boyınsha máseleler haqqında da sóz etildi.
