Ózbekstan Respublikası Prezidentiniń 2021-jıl 29-iyuldaǵı BMSh Bas Assambleyasınıń 2021-jıl 18-maydaǵı «Aralboyı regionın ekologiyalıq innovaciyalar hám texnologiyalar aymaǵı dep járiyalaw haqqındaǵı arnawlı rezolyuciyasın ámelge asırıw ilajları haqqında»ǵı PQ-5202-sanlı qararınıń 1-qosımshası 1-bándinde berilgen tapsırmanıń orınlanıwın támiyinlew maqsetinde Nokis jaslar texnoparkinde «Jas ilimpazlar akademiyası» JShJ shólkemlestirildi. 2022-jıl 4-oktyabr kúni Qaraqalpaq mámleketlik universiteti bas imaratınıń májilisler zalında «Jas ilimpazlar akademiyası» JShJ direktorı Sevara Rustamova, Qaraqalpaqstan Respublikası aymaqlıq innovaciyalıq rawajlanıw basqarmasınıń Ilimiy iskerlikti rawajlandırıw boyınsha bas qánigesi Erkin Abdiganiev, «Jas ilimpazlar akademiyası» JShJ qánigesi Nadjibulla Kaliev, Ilimiy-izertlewler, innovaciyalar hám ilimiy pedagog kadrlardı tayarlaw bólimi baslıǵı Qayrat Nizamatdinov hámde universitet jas alımları, professor-oqıtıwshıları, doktorantları ortasında ushırasıw ótkerildi.

Ushırasıwda qánigeler tárepinen «Jas ilimpazlar akademiyası» JShJ tiykarǵı wazıypaları, Qaraqalpaqstan Respublikasındaǵı joqarı bilimlendiriw hám ilim-izertlew mekemelerindegi ilimiy xızmet penen shuǵıllanıp atırǵan alımlardıń bazasın qáliplestiriw, jas alımlardıń ilimiy potenciyalın arttırıw, olardıń ilim-izertlew jumısların qollap-quwatlaw, ámeliy hám innovaciyalıq proektlerdi ámelge asırıwǵa kómeklesiw, intellektual múlk obektlerin qorǵaw, paydalı model, sanaat úlgileri hám oylap tabılıwlar ushın alınatuǵın patentler, elektron esaplaw mashinaları hám maǵlıwmatlar bazaları ushın alınatuǵın gúwalıqlar, olardıń beriliw tártipleri, patent hám gúwalıqlar alıw ushın tapsırılatuǵın hújjetler haqqında keń túrde túsinikler berildi hám ushırasıw qatnasıwshıları kún tártibindegi máseleler boyınsha ózlerin qızıqtırǵan sorawlarına tiyisli juwapların aldı.