Búgin Berdaq atındaǵı Qaraqalpaq mámleketlik universitetinde «Korrupciya jınayatı túsinigi hám oǵan tayınlanatuǵın jınayıy juwapkershilik túrleri» atamasında tiyisli taraw qánigeleri menen ushırasıw bolıp ótti. Ushırasıwǵa Qaraqalpaqstan Respublikası Joqarǵı Keńesiniń Nızamshılıq, sud-huqıq hám korrupciyaǵa qarsı gúresiw komiteti baslıǵı Z.Reymova, Qaraqalpaqstan Respublikası Prokurorınıń orınbasarı E.Qayıpbergenov, Qaraqalpaqstan Respublikası Ishki isler ministrliginiń Tergew basqarması baslıǵı A.Ótemuratov, Qaraqalpaqstan Respublikası Ádillik ministrliginiń úgit-násiyatlaw bólimi baslıǵı A.Ótewliev, Qaraqalpaqstan Respublikası Joqarı sudı sudyası S.Dawletmuratov, universitettiń barlıq fakultet dekenları, professor-oqıtıwshıları hám student-jasları qatnastı. Ushırasıwdı universitet rektorı A.Reymov alıp barıp, ol óz sózinde korrupciya dúnya kóleminde sheshiliwi kerek bolǵan global mashqalalardıń biri ekenligi, bunday jaman illet hár qanday mámleket hám jámiyettiń siyasiy ekonmikalıq rawajlanıwına keri tásirin kórsetip, insan huqıq hám erkinlikleriniń ayaq astı bolıwına alıp keletuǵınlıǵın, usınday unamsız jaǵdaylarǵa qarsı gúresiw búgingi kún siyasatınıń áhmiyetli máseleleriniń biri ekenligin aytıp ótti. Bunnan soń, Qaraqalpaqstan Respublikası Joqarǵı Keńesiniń Nızamshılıq, sud-huqıq hám korrupciyaǵa qarsı gúresiw komiteti baslıǵı Z.Reymova sózge shıǵıp, búgingi kúnde barlıq tarawlarda Korruptsiyaǵa qarsı ishki qadaǵalaw strukturaları korrupciya jaǵdayların waqtınan burın anıqlaw, korrupciyasız tarawdı rawajlandırıw boyınsha kompleks is-ilajlar ámelge asırılıp atırılǵanlıǵı, biraq usınday úgit-násiyat ilajların alıp barılıp atırılǵanlıǵına qaramastan elde dawam etip atırǵanlıǵın hár túrli mıssalar menen aytıp, bul boyınsha arnawlı telegram botlarınıń islep turǵanlıǵın aytıp ótti. Sonıń menen bir qatarda Qaraqalpaqstan Respublikası Prokurorınıń orınbasarı E.Qayıpbergenov sózge shıǵıp, korrupciyaǵa qarsı gúresiw, olarǵa imkaniyat jaratıp berip atırǵan sebep hám jaǵdaylardıń aldın alıw boyınsha bir qatar Nızamlar hám nızam astı hújjetleri qabıl etilgenligin hám ayrım joqarı oqıw orınlarnda korrupciya menen baylanıslı halatlardıń ushırasıp atırǵanlıǵın aytıp, bársheni bunday jaman illetten awlaq bolıwǵa shaqırdı. Sonday-aq, ilajda sózge shıqqanlar korrupciya –jámiyettiń rawajlanıwına keri tásir etip qoymastan, elimizdegi háreket etip turǵan nızamlarǵa isenimsizlik hám olarǵa húrmetsizlik túsinigin payda etetuǵınlıǵın, sonlıqtanda bul illetke qarsı gúresiw eń aldı menen hár bir insannıń ózine baylanıslı ekenligin, korrupciyanın aldın alıwda jámiyetshilik qadaǵalawın kúsheytiw kerek ekenligin aytıp, bársheni bul jaman illetke qarsı gúresiwde biyparwa bolmawǵa shaqırdı.
QMU baspasóz qızmeti
