Berdaq atındaǵı Qaraqalpaq Mámleketlik Universiteti Yuridika fakultetinde tálim sapasına baylanıslı seminar bolıp ótti. Onda fakultet dekanı F.Qutlımutratov universitetimizdiń tálim sapasın qadaǵalaw bólimi baslıǵı Sh.Eshmuratov hám fakultet professor-oqıtıwshıları qatnastı. Seminarda Sh.Eshmuratov Ózbekstan Respublikasınıń JOOların xalıqaralıq reytinglerde múnásip orınlarǵa erisiw baǵdarında bir qatar alıp barılǵan jumıslar haqqında hám 2021-jıl juwmaǵı boyınsha QMU milliy reytingte 29-orınǵa kóterilgenligi haqqında aytıp ótti. Bul baǵdarda ministrlik tárepinen 10 JOOların jol karta tiykarında basqıshpa-basqısh Xalıqaralıq reytinglerge kiritiw boyınsha THE, QS reyting agentlikleri menen shártnamalar dúzilgenligi haqqında aytıp ótildi.
Xalıqaralıq reyting agentliklerinen Times Higher Education (THE) Impact Ranking 2022, QS EECA Ranking (QS reyting agentliginiń Shıǵıs Evropa hám Oraylıq Aziya boyınsha reytinginde), sonday-aq, Ózbekstan Respublikası tálim sapasın qadaǵalaw inspekciyası reytingi maǵlıwmatları tiykarında Ózbekstannıń TOP-10 Eń jaqsı universitetin anıqlanģanlıgı haqqında aytıp ótti.
Bunda QMU THE Impact Ranking 2022 de Ózbekstan JOOları arasında 7—orın (+1000), QS EECA reytinginde 5-orındı (471), milliy reytingte 29-orındı alǵanlıǵı sebepli bul dizimge kirgizilgen. Sonday-aq, hár jılı THE, QS reyting agentlikleri tárepinen ótkeriletuǵın sorawnamalar tiykarında da xalıqaralıq reytingler anıqlanadı. Buǵan óz úlesin qosqan professor-oqıtıwshılarǵa minnetdarshılıq bildirildi. Barlıq kórsetkish boyınsha reyting nátiyjesin joqarılatıw boyınsha jol joba berildi. Seminarǵa qatnasqan professor-oqıtıwshılar ózleriniń qızıqtırǵan sorawlarına juwaplar aldı.
Yuridika fakulteti ilimiy isler boyınsha
dekan orınbasarı I.Jollibekova
