Berdaq atındaǵı Qaraqalpaq mámleketlik universitetinde úzliksiz (akademiyalıq tánepissiz) kúndizgi bilimlendiriw túrinde oqıp atırǵan 2-, 3- hám 4-kurs studentleri arasında «Jıl studenti» respublikalıq tańlawınıń universitet basqıshına hújjetler qabıllanatuǵınlıǵın daǵazalaymız.

Tańlaw tómendegi nominaciyalar boyınsha ótkeriledi:

1) «Jıldıń eń belsendi bilimli studenti»; (óz qánigeligi boyınsha), bunda studenttiń pánlerdi ózlestiriwi hám oqıw processinne qatnasıwı hám belsendiligi, baspadan shıqqan maqala hám tezisleri  sonday-aq olardıń mazmun-mánisi, áhmiyetine baylanıslı jumısları kórip shıǵıladı;

2) «Jıldıń eń belsendi úgit-násiyatshı studenti»; bunda studenttiń joqarı oqıw orınlarında jámiyetlik jumıslarda hám baqsqada jámiyetlik shólkemler jumıslarında, belsendilik dárejesi, úgit-násiyatshı sıpatındaǵı úlgili jumısları, shólkemlestiriwshilik qábileti hám usı tiykarda ózi shólkemlestirgen ilajlar, qolǵa kirgizgen tabısları kórip shıǵıladı;

3) «Jıldıń eń belsendi oylap tabıwshı-innovator studenti»; bunda usı jılda student tárepinen jaratılǵan ilimiy jumıslar, oylap tabılıwlar, innovatciyalıq ideyaları, ratsionalizatorlıq usınıslar, olardıń jańalıǵı, ilimiy áhmiyetliligi kórip shıǵıladı;

4) «Jıldıń eń belsendi sportshı studenti»; bunda usı jılda studenttiń xalıqara hám respublika kóleminde ótkerilgen sport jarıslarındaǵı jetiskenligi hám nátiyjeleri kórip shıǵıladı; 

5) «Jıldıń eń belsendi qábiletli studenti» bunda studenttiń usı jılda sociallıq tarmaqlarda ózi jaratqan tálim alıwǵa student-jaslardı úgit-násiyat qılıwshı jumıslar hám joqarı oqıw sistemasında alıp barılıp atırılǵan jańalanıwlardı jarıtıwda belsendilik dárejesi hám usı tarawda erisken tabısları kórip shıǵıladı;

6) «Jıldıń eń belsendi dóretiwshi studenti»;  bunda studenttiń usı jılda óz dóretiwshilik kórkem shıǵarmaları, maqala, bıyılǵı jılda baspadan shıǵarılǵan qollanba, kitap, muzıka, kino hám  teatr tarawındaǵı qızıǵıwshılıǵı hám ruwqıy-aǵartıwshılıq,  ilimiy-dóretiwshilik processlerinde qatnasqanlıǵı hám qolǵa kirgizgen tabısları kórip shıǵıladı; 

7) «Jıldıń eń belsendi isbilermen studenti» (hayal-qızlar ushın), bunda usı jılda ǵárezsiz túrde isbilermenlikti  jolǵa qoyǵan student-qızlardıń erisken tabısları hám jaslardı jumıs penen támiyinlegenligi kórip shıǵıladı. 

Tańlawǵa universitette úzliksiz (akademiyalıq tánepissiz) kúndizgi bilimlendiriw túrinde oqıp atırǵan 2-, 3- hám 4-kurs studentleri qatnasa aladı.

Qatnasıwshıǵa tiyisli bolǵan tómendegi hújjetler toplamı fakultet dekanatı tárepinen tayarlanadı hám tańlaw komissiyasına usınıladı:

— qatnasıwshınıń qábileti, pánlerdi ózlestiriw dárejesi, jetekshilik qábileti, erisken tabısları, sabaqlardaǵı belsendi qatnası, studentlerge órnek bolatuǵın tárepleri hám jámiyetlik jumıslardaǵı belsendiligi haqqında maǵlıwmatlar jazılǵan eki betten kóp bolmaǵan kólemdegi usınısnama;

— tańlaw qatnasıwshısınıń pánlerdi ózlestiriw nátiyjeleri kórsetilgen hújjetlerdiń (bahalardı dizimge alıw betleri, studenttiń bahalardı ózlestiriw sınaw dáptershesi) nusqaları;

— tańlaw qatnasıwshısınıń basıp shıǵarılǵan ilimiy, ilimiy-metodikalıq, dóretiwshilik jumısları, olarǵa tiyisli qánigelerden alınǵan pikirler menen birge dóretiwshilik jumıslarınıń elektron forması;

— xalıqaralıq hám respublikalıq kólemde ótkerilgen ilajlar, tańlawlarda húrmet jarlıqları hám diplomlar menen sıylıqlanǵanı haqqındaǵı maǵlıwmatlar (nusqaları qosımsha etiledi);

— grantlarǵa qatnasqanlıǵı haqqındaǵı maǵlıwmatnama, granttıń ataması, qarjılandırıw kólemi, qatnasıwınıń forması hám dárejesi kórsetiledi;

— konferenciyalarǵa qatnasqanı haqqındaǵı maǵlıwmatlar, ilimiy jumıslarınıń dizimi hám ilimiy jumıslarınıń nusqaları qosımsha etiledi;

— hújjetler toplamına kirgizilgen materiallar hám maǵlıwmatlar usı jıl dawamında basıp shıǵarılǵan bolıwı kerek.

Tańlaw komissiyası qatnasıwshılardıń hújjetler toplamı, sabaqlarǵa hám jámiyetlik jumıslarǵa qatnasıwınıń sapasın, sonday-aq, qatnasıwshı menen individual ótkerilgen sáwbet sheńberinde alınǵan maǵlıwmatlardı bahalaw nátiyjelerin esapqa alǵan halda hár bir nominaciya boyınsha jeńimpaz (1-, 2- hám 3-orın)lardı anıqlaydı jáne 1-orın jeńimpazların tańlawdıń respublikalıq basqıshında qatnasıw ushın usınıs etedi.

Nominaciyalar boyınsha 1-, 2- hám 3-orınlardı iyelegen jeńimpaz jáne sıylı orın iyeleri joqarı oqıw ornınıń húrmet jarlıǵı menen sıylıqlanadı hám tiyisli ráwishte 1-orın iyesi bazalıq esaplaw muǵdarınıń 8 esesi muǵdarında, 2-orın iyesi bazalıq esaplaw muǵdarınıń 6 esesi muǵdarında hám 3-orın iyesi bazalıq esaplaw muǵdarınıń 4 esesi muǵdarında materiallıq jaqtan xoshametlenedi.

Tańlawǵa hújjetlerdi  usı jıldıń 20-oktyabr sánesinen keshiktirmesten komissiya aǵzalarına yaǵnıy ruwxıy-aǵartıwshılıq bálimine tapsırıwıńız shárt.