Búgin, 19-oktyabr kúni Innovaciyalıq rawajlanıw ministrliginde «InnoWeek.uz-2022» Xalıq aralıq innovaciyalıq ideyalar hápteligi kórgizbeleri dawam ettirildi. Kórgizbege Qaraqalpaqstan Republikası, wálayatlar haım Tashkent qalasınan  kelgen joqarı oqıw orınları hám ilim-izertlew institutlarınıń ilimpazları, jergilikli isbilermenler hámde student jaslar ózleriniń innovaciyalıq islenbeleri menen qatnaspaqta. Kórgizbede innovaciyalıq islenbeler tarawlar boyınsha bólip jaylastırılǵan hámde shet el hám jergilikli miymanlardıń úlken qızıǵıwshılıǵın oyatpaqta.

Sonday-aq, «InnoWeek.uz-2022» Xalıq aralıq innovaciyalıq ideyalar hápteligine Qaraqalpaq mámleketlik universiteti Ilimiy isler hám innovaciyalar boyınsha prorektorı I.Turdimambetov basshılıǵındaǵı professor-oqıtıwshıları hámde student-jasları  belsendi qatnaspaqta.

Innovaciyalıq rawajlanıw ministrliginde «InnoWeek.uz-2022» Xalıq aralıq innovaciyalıq ideyalar hápteligi sheńberinde “TechnoWays” texnologiyalıq rawajlanıw marafon tańlawınıń eń sońǵı respublikalıq final basqıshında respublikamızdaǵı barlıq joqarı oqıw orınlarınan kelgen 90 nan aslam ziyrek student jaslar ózleriniń ilimiy-innovaciyalıq islenbeleri menen qatnastı.

Tańlawǵa universitetimiz Matematika fakulteti “Kompyuter ilimleri hám programmalastırıw texnologiyaları” baǵdarınıń 3-basqısh studenti Qogambayev Asadbek Janibek ulı “Orfo-QARAKEŃ” (MS Office dastúri ushın programma) joybarı menen qatnastı. Tóreshiler quramı tárepinen onıń joybarı joqarı bahalanıp,  tańlawdıń juwmaqlawshı final basqıshı jeńimpazı dep tabıldı hámde Ózbekstan Respublikası Innovaciyalıq rawajlanıw ministri Ibrohim Abdurahmonov tárepinen  arnawlı sertifikat hám estelik ushın jeke kompyutor (noutbook) penen sıylıqlandı.

Universitet rektoratı Qogambayev Asadbekti hám universitet jámáátin erisken úlken jetiskenlikler menen qutlıqlaydı hám Asadbektiń  dóretiwshilik ilimiy jumıslarında tasqın tabıslar tilep qaladı!

QMU Baspasóz xızmeti