Búgin Berdaq atındaǵı Qaraqalpaq mámleketlik universiteti Matematika fakultetiniń professor-oqıtıwshıları hám student-jasları Novosibirsk mámleketlik universiteti Mexanika-matematika fakultetiniń professorı Oleg Aleksandrovich Danilov penen ushırastı. Ushırasıwdı Qaraqalpaq mámleketlik universiteti ilimiy isler hám innovaciyalar boyınsha prorektorı I.Turdımambetov alıp bardı. Bul ushırasıwdı shólkemlestiriwden tiykarǵı maqset matematika fakultetinde bakalavr baǵdarında oqıp atırǵan ziyrek student-jaslardıń keleshekte Novosibirsk mámleketlik universitetinde oqıwın dawam ettiriwi ushın jaratılǵan imkaniyatlardan durıs paydalanıw haqqında kóplegen maǵlıwmatlar berildi. Sonday-aq, ushırasıw dawamında student-jaslar ózleriniń qızıqtırǵan sorawlarına juwaplar aldı. Novosibirsk mámleketlik universiteti 2022 jılı QS World University Rankings reytinginde 260 orında, Rossiya universitetleri arasında 3 orında turadı. Házirgi waqıtta Qaraqalpaq mámleketlik universiteti Matematika fakultetiniń matematika tálim baǵdarınıń pitkeriwshilerinen Novosibirsk mámleketlik universiteti Mexanika matematika fakultetiniń magistraturasında 8 magistrant, aspiranturada bolsa 4 aspirant oqıp kelmekte.

T.Kurbanbaev. Funkcionallıq analiz, algebra hám geometriya kafedrası baslıǵı