Usı jıldıń 26-oktyabr kúni Berdaq atındaǵı Qaraqalpaq mámleketlik universitetinde jazıwshı M.Nızanovtın “Úlkemizdiń ájayıp adamları” atamasındaǵı jańa kitaptıń prezentaciyası hám avtor menen ushırasıw bolıp ótti. Onda universitetimizdiń profesor-oqıtıwshıları, student-jaslar qatnastı. Ushırasıwdı, Qaraqalpaq ádebiyatı kafedrasınıń professorı Q.Orazımbetov alıp bardı. Dáslep, ol kitap haqqında óziniń pikirlerin bildirip, búgingi kúnde onıń áhmiyeti haqqında aytıp ótti. Bunnan soń, Qaraqalpaq ádebiyatı kafedrasınıń professorı Q.Jarimbetov, ádebiyatshı hám shayır B.Genjemuratovlar sózge shıǵıp, kitaptıń mazmunı onıń keleshek áwlad ushın áhmiyeti, sonday-aq jazıwshınıń sheberligi haqqında bahalı pikirlerin bildirdi.
Xaqıyqatında da «Eger sennen kimligińdi sorasa, bárshe maǵlıwmatlarıń jazılǵan pasportıńdı kórsetiwiń múmkin. Eger xalıqtan kimligin sorasa, ol sonday hújjet ornına óziniń alımı, shayırı, xudojnigi, kompozitorı, siyasiy ǵayratkerin, sárkardasın kórsetedi», – degen edi avar xalqınıń shayırı R.Gamzatov. Usı sıyaqlı qaraqalpaq xalqınıń da maqtanısh etetuǵın perzentleri, túrli tariyxıy dáwirlerde qaharmanlıq isleri hám pidayı xızmetleri menen tanılǵan azamatları bar. Jazıwshı M.Nızanovtıń bul kitabında XX ásirde Qaraqalpaqstannıń rawajlanıwına ayrıqsha úles qosqan insanlar haqqında sóz etiledi. XX ásirdiń basındaǵı siyasiy burılıslar dáwirinde xalqımız iygiligi ushın barlıq kúsh-jigerin ayamay xızmet etken, hátteki, óz ómirlerin de qurban etken tariyxıy tulǵalar Allayar Dosnazarov, Kóptilew Nurmuhamedov, Qasım Áwezov, Ábiw Qudabaevlar, respublikamızdıń qońsılas respublikalar menen teńdey qádem taslap rawajlanıwına at salısqan el basshıları Pirjan Seyitov, Máteke Jumanazarov, Nawrız Japaqov, Qállibek Kamalovlar, xalqımızdıń ádebiyatı menen mádeniyatı, ilimi hám turmısınıń rawajlanıwına salmaqlı úles qosqan insanlar Ayapbergen Muwsaev, Abbaz Dabılov, Nájim Dáwqaraev, Qallı Ayımbetov, Jolmırza Aymurzaev, Tilewbergen Jumamuratov, Ayımxan Shamuratova, Ibrayım Yusupov, Tólepbergen Qayıpbergenov, Marat Nurmuxamedov, Sabır Kamalov, Orazımbet Xalmuratov, Ziynel Piyazovlardıń ómir jolı, pidákerlik miynetleri tuwralı Quatbay Abdireymov, Shamurat Ótemuratovlar haqqında maǵlıwmatlar berilgen. Atları tariyx jılnamasında jazılıp qalǵan bul azamatlardıń ómiri hám xızmetleri keleshek áwladqa úlgi boları sózsiz.
QMU baspasóz xızmeti
