Qaraqalpaq mámleketlik universiteti quramındaǵı Repressiya qurbanların eslew muzeyi jámááti, tariyx fakulteti oqıtıwshıları menen birgelikte muzey ekspoziciyaların bayıtıw, olardı ilmiy aylanısqa túsiriw maqsetinde respublikamızdıń qala hám rayonlarına turaqlı túrde ilimiy saparlar shólkemlestirilip kelinbekte. Respublikamızdıń qubla aymaǵında jaylasqan, tıń jerlerdi ózlestiriw nátiyjesinde paxta jetilistiriwge arnalǵan Tórtkúl, Ellikqala rayonları esaplanadı. Bul atı kórsetilgen rayonlardan basqada paxtashılıq xojalıqlarında 1985-1988-jılları «Paxta isi» ne shatılǵan sovxoz direktorları, paxtashılıq xojalıqları bas esapshıları, kassir, paxta qabıllawshı hám paxta tapsırıwshılarǵa jazıqsız jınayat isleri ashılǵan. Qaraqalpaq mámleketlik universiteti quramındaǵı Repressiya qurbanların eslew muzeyi direktorı A.Qudiyarov muzey xızmetkerleri A.Alimbetov, M.Rametullaev, Ózbekstan hám Qaraqalpaqstan tariyxı kafedrası baslıǵı I.Elmuratovlar usı jılı 23-24-oktyabr kúnleri gezektegi ilimiy saparda bolıp qayttı.
Dáslep Ellikqala rayonı Doslıq APJ turǵını, burınǵı Doslıq kolxozı baslıǵı lawazımında islegen, 1986-jılı «Paxta isi» boyınsha irkiwge alınıp jeti jılǵa erkinen ayırılǵan Sherimbetov Muxammad shańaragına barıp onıń balası Sherimbetov Islamnıń shańaraǵında bolıp ákesiniń jumıs islegen waqıtlarındaǵı jeke súwreti, irkiwge alınǵanı hám aqlanǵanlıǵı haqqındaǵı hújjetleri, sol dáwirde rayonlıq, qalalıq keńeske depudat bolıp saylanǵanlıǵı haqqındaǵı gúwalıǵı muzeyge eksponat retinde alındı. Sonday aq usı rayondaǵı Doslıq APJ turǵını 1957-jılı tuwılǵan, burınǵı Doslıq kolxozı bas esapshısı lawazımında islegen, 1986-jılı «Paxta isi» boyınsha irkiwge alınıp tórt jılǵa erkinen ayırılǵan Abutjanov Sharafatdin menen ushırasıp sol dáwirdegi tariyxıy waqıyalar haqqında maǵlıwmatlar, jumıs islegen waqıtlarındaǵı jeke súwreti, irkiwge alınǵanı hám aqlanǵanlıǵı haqqındaǵı hújjetleri, sol dáwirde paydalanılǵan esaplaw quralı muzeyge eksponat retinde alındı.
Sapar dawamında Tórtkúl rayonı burınǵı XXV-partsezd sovxozı direktorı lawazımında islegen 3 jılǵa erkinen ayırılǵan Axmedov Ibrayımnıń házirgi waqıtta usı rayondaǵı Ullıbaǵ APJ 3-bólimde jasawshı bolıp onıń qızı Axmetova Zamira hám ullarınıń shańaraǵında bolıp ákesiniń sol dáwirde paydalanǵan Tórtkúl rayonı sovxoz kolxozlarınıń dúziliwi, Tórtkúl rayonınıń social ekonomikalıq rawajlanıwında belsene xızmet etken Yuldash Qurbanovtıń miynetlerine arnalǵan kitapsha, Qaraqalpaqstan haqqında 1974, 1984-jılları baspadan fotoalbom, Axmedov Ibrayımǵa tiyisli znachok, medallar, onıń jumıs waqtındaǵı tariyxıy súwretleri muzeyge eksponat retinde alındı.
Sonıń menen birge Tórtkúl rayonı, Beruniy APJ, Aybek kóshesi 32-jayda jasaǵan, tórtkúl paxta tazalaw zavodı direktorı lawazımında islegen, 1984-jılı 13-noyabr kúni jazıqsız jınayat isi ashılıp, úsh jılǵa erkinen ayırılǵan Tájiev Sátim aǵanıń shańaraǵında bolıp onıń balası Tajiev Ǵafurdan ákesiniń jumıs islegen waqıtlarındaǵı jeke súwretleri, irkiwge alınǵanı hám aqlanǵanlıǵı haqqındaǵı hújjetleri, narazılıq arza shaǵım xatları muzeyge eksponat retinde alındı.
Jáne de sapar dawamında Tórtkúl rayonı, burınǵı XXV-partsezd sovxozı bas esapshısı lawazımında islegen Amanov Sattardıń, rayondaǵı burınǵı Yu.Qurbanov atındaǵı texnikumnıń bas esapshısı lawazımında islegen Aqnazarov Xudayshukurdiń shańaraǵında, XXV-partsezd sovxozında kassir bolıp islegen 1955-jılı tuwılǵan Dosanov Axmet penen ushırasıp, sol dáwirdegi tariyxıy waqıyalar, jumıs babındaǵı hám jeke súwretleri, tergew waqtındaǵı soraw juwap hám jumıs babındaǵı hújjetler, qánigeni esapqa alıw boyınsha jeke is qaǵazı, sudqa arza shikayat hám bildiriw xatları, jeke ózleri paydalanǵan ayırım zatlar muzey ushın alındı.
Bul ilimiy sapar dawamında alınǵan zatlar, súwret hám hújjetlerler qánigeler tárepinen qayta úyrenilip bolınǵannan soń muzey ekspoziciyası ushın rásmiylestirilip alınadı. Bul eksponatlar muzey ekspoziciyasın bayıtıw menen birge keleshekte muzeyde studentler hám magistrantlardıń qánigelik ámeliyat ótewi hám jas ilimiy xızmetkerler ushın ilimiy derek retinde paydalanıwda úlken tariyxıy áhmiyetke maǵlıwmatlar bolıp esaplanadı.
Ańsatbay Alimbetov
Muzey xızmetkeri
