QMU Kórkem-óner fakultetinde hayal-qızları arasında zorlıq-zombılıq hám aldawshılıq jınayatlarınıń aldın alıw maqsetinde, «Aldawshılıqqa jol joq» atamasında akciya shólkemlestirildi. Akciya sheńberinde student qızlar arasında «Biz zorlıq hám aldawshılıqqa qarsımız» súreni astında suwretler tańlawı ótkerildi. Tańlawǵa student qızlar óz ideyası menen sızılǵan súwretleri menen qatnastı. Sonday-aq akciya sheńberinde tiyisli taraw qánigeleri qatnasıwında ushırasıw bolıp ótti. Ushırasıwǵa Berdaq atındaǵı QMU Hayal-qızlar máseleleri boyınsha rektor másláhátshisi I.Seytnazarova, Qaraqalpaqstan Respublikası Ishki isler ministrligi jámiyet qáwipsizligi xızmeti huqıqbuzarlıqlar profilaktikası basqarması baslıǵı orınbasarı podpolkovnik X.Reyimqulova, Nókis qalası Ishki isler organları jumısların muwapıqlastırıw basqarması hayal-qızlar máseleleri boyınsha aǵа inspektorı A.Namenova, Berdaq atındaǵı QMU Hayal-qızlar máseleleri boyınsha inspektorı R.Tasbaeva hám Kórkem-óner fakulteti student qızları qatnastı. Ilajdı Berdaq atındaǵı QMU Hayal-qızlar máseleleri boyınsha rektor másláhátshisi I.Seytnazarova basqarıp bardı. Ol óz sózinde házirgi waqıtta hayal-qızlar arasında ushırasıp atırǵan jınayatlar hám tártip-buzarlıqlardıń kópshiligi zorlıq-zombılıq hám aldawshılıq sebepli júz berip atırǵanlıǵın aytıp ótti. Bul boyınsha úgit-násiyat jumısları alıp barılsada, jeterli maǵlıwmatqa iye emesligi sebepli usınday jaǵdaylardıń tez-tez ushırasıp atırǵanlıǵı qánigeler tárepinen anıq faktler menen aytılıp ótildi. Sonıń menen bir qatarda tańlaw jeńimpazları Nókis qalası Ishki isler organları jumısların muwapıqlastırıw basqarması baslıǵı tárepinen diplom hám bahalı sawǵalar menen sıylıqlandı.

Kórkem-óner fakulteti hayal-qızlar másláhátshisi: N.Rametullaeva