Búgin Berdaq atındaǵı Qaraqalpaq mámleketlik universitetinde Qaraqalpaqstan Respublikası Ishki isler ministri, polkovnik Baxtiyar Tórebekovtıń student-jaslar menen ushırasıwı bolıp ótti. Ushırasıwǵa barlıq fakultet, tyutorlar, professor-oqıtıwshılar, belsendi student-jaslar, ishki isler uyımlarınıń juwaplı xızmetkerleri hám profilaktikalıq inspektorları qatnastı.
Ushırasıwdı universitetimizdiń jaslar máseleleri hám ruwxıy-aǵartıwshılıq isleri boyınsha prorektorı S.Alauatdinov basqarıp bardı. Dáslep, Qaraqalpaqstan Respublikası Ishki isler ministri B.Tórebekov sózge shıǵıp, ol óz sózinde mámleketimizde tárepinen bilimlendiriw tarawında ámelge asırılıp atırılǵan jańa reformalar, jaslardı joqarı bilimli, fizikalıq hám ruwxıy bay insan etip tárbiyalaw, bilimlendiriw mákemeleriniń basshı hám pedagog xızmetkerleriniń abıroyın asırıw, olardıń nátiyjeli miynet etiwi ushın zárúr shártsharayatlar jaratıw boyınsha bir qatar jumıslar alıp barılıp atırǵanlıǵın aytıp ótti. Biraq bunday imkaniyatlardıń jaratılıp berilgenligine qaramastan student-jaslar arasında ushırasıp atırǵan jınayatlar ashınarlı jaǵday ekenin óz sozinde keltirip ótti. Jaslar arasında ushırasıp atırǵan jınayatshılıq hám huqıqbuzarlıqlar ásirese studenler arasında kóp tarqalıp atırǵan telefon urlıqları, kafe-restoranlarda spirtli ishimlikler iship jánjellesiw halatları, bir-birine dene jaraqatların jetkeriw hám avtotransportlardan paydalanıp avariyalıq jaǵdaylardıń kelip shıǵıwı, jol qaǵıydalarına boysınbastan jol háreketin buzıp insan salamatlıǵına hám ómirine qáwip tuwdırıwshı jaǵdaylar, sonıń menen birge kiber jınayatına qol urıp jınayıy juwapkershilikke tartılıwdıń aqıbetleri haqqında túsindirildi.
Sonday-aq, ilaj dawamında iyul ayı basında paytaxtımız Nókis qalasında júz bergen kewilsiz waqıyalardıń aqıbetleri haqqında tayarlanǵan videorolik jıynalǵanlardıń názerine usınıldı. Ilajda student-jaslar jınayatshılıqtı boldırmaw hám onıń aldın alıw boyınsha óziniń pikir usınısların bildirdi. Bunnan soń, ministr Baxtiyar Tórebekov universitetimizde kewilli jaslardan dúzilgen profilaktikalıq inspektorları járdemshileri menen sáwbetlesip, olardıń pikir usınısların tıńlap, aldaǵı oqıwlarında tabıslar tiledi.
QMU baspasóz xızmeti
