Yuridika fakulteti 1-basqısh studentleriniń ata-anaları hám fakultet dekanı F. Qutlımuratov, dekan orınbasarları M. Tlewmuratov, A. Reymbaev, B. Ermekbaev hám tiyisli topar tyutorları qatnasında májilis bolıp ótti. Ilajdı G. Qazaqbaeva ashtı hám alıp bardı. Ol óz sózinde ata-analarǵa studentlerdiń tálim-tárbiyası, minez-qulqı hám studentlik statusına tán bolǵan barlıq máseleler sonday-aq, ijara úylerinde jasawshı studentlerdiń jasaw shárayatları, aymaqlar kesiminde úyreniw jumıslarınıń nátiyjeleri hám gúz-qıs máwsiminde júzege keliwi múmkin bolǵan ayırıqsha jaǵdaylardıń aldın alıwda eki tárepleme úgit-násiyatlaw ilajların birge alıp barıw, qadaǵalaw zárúrligi hám studentler tárepinen túrli huqıqbuzarlıqlar júz bermewi ushın jaslar tárbiyasına dıqqat-itibarlı bolıw haqqında sóz etti.

Bunnan soń, oqıw isleri boyınsha dekan orınbasarı M. Tlewmuratov oqıw processine baylanıslı barlıq máseleler, kredit-modul sisteması boyınsha maǵluwmat berdi. Májilis sońında fakultet dekanı F. Qutlımuratov fakultet jámááti menen tanıstırıp, professor-oqıtıwshılardıń ilimiy potenciyalı hám belsendi studentlerdiń tabısları haqqında aytıp, óz náwbetinde ata-analarǵa perzentleriniń jaqsı oqıp, ilim-bilim úyreniw nátiyjesinde keleshekte elimizdıń huqıqıy nızamlılıq tarawında jetik qánigeler bolıwı ushın birgelikte qollap-quwatlaw zárúrligin bildirip, qısqa waqıt ishinde oqıwda hám jámiyetlik jumıslarda belsendi bolıp jaqsı tárepten kózge túsip kiyatırǵan studentlerdiń ata-analarına alǵısnamalar tapsırıldı.

Yuridika fakulteti, yurisprudenciya tálim baǵdarı 101-topar sárdarı Salamat Ázirbaev