Elimizde sportqa itibar oǵada kúshli. Sonlıqtan jaslarımız tárbiyasında da sport penen shuǵıllanıw óziniń unamlı tásirin tiygizedi. Isbilermenler háreketi – Ózbekstan Liberal-demokratiyalıq partiyası Qaraqalpaqstan Respublikalıq Keńesi tárepinen Berdaq atındaǵı Qaraqalpaq mámleketlik universitetinde 1-kurs student jasları arasında sporttıń mini futbol hám hayal-qızlar arasında stol tennis túri boyınsha jarıs bolıp ótti. Jarıstı ótkeriwden tiykarǵı maqset bolsa jaslar arasında salamat turmıs tárizin qáliplestiriw, sporttıń ǵalabalıǵına erisiw, ásirese jaslarımızdın bos waqıtların mazmunlı ótkeriw hám sportqa keńirek tartıwdan ibarat.

Jarısta Berdaq atındaǵı Qaraqalpaq mámleketlik universiteti jaslar máseleleri hám ruwxıy-aǵartıwshılıq isleri boyınsha prorektorı S.Alauatdinov, O’zLiDeP Qaraqalpaqstan Respublikalıq Keńesi apparat baslıǵı K.Artıkovlar sózge shıǵıp, elimizde sportqa qaratılǵan joqarı dıqqat-itibar nátiyjesinde, sportqa qızıqqan jaslarımız ushın imkaniyatlar kólemi keńeyip, sport penen shuǵıllanıwshı jaslarımız arasında sport túrlerinen ótkerilip atırǵan jarıslar, erisip atırǵan jetiskenlikler olardıń sportqa degen ıqlasın jánede arttırıp atırǵanlıǵın turmıslıq mısallar menen atap ótti. Sonday-aq insan salamatlıǵın bekkemlewde sporttıń tutqan ornı ayrıqsha ekenligin aytıp ótip, jarısta qatnasıp atırǵan jaslarǵa áwmet tiledi. Eki kún dawam ótken sport jarısında sporttıń mini futbol túri boyınsha fakultetler arasında 3 orın biologiya fakulteti, 2 orın ekonomika fakulteti iyelegen bolsa, 1 orındı arxitektura fakulteti jeńip aldı. Hayal-qızlar arasında ótkerilgen stol tennisi boyınsha 3 orın tariyx fakultetiniń 1-kurs studenti F.Madreymova, 2 orın shet tiller fakultetiniń 2 kurs studenti M.Kamalova, 1 orındı bolsa biologiya fakultetiniń 4 kurs studenti Yu. Qudaybergenova iyeledi. Jarısta jeńimpaz bolǵanlarǵa shólkemlestiriwshiler tárepinen diplom hámde estelik sawǵaları tapsırıldı.