️Berdaq atındaǵı Qaraqalpaq mámleketlik universiteti rektorı A.Reymov tárepinen barlıq fakultetlerde, kafedralarda ámelge asırılıp atırılǵan jumıslar, jetiskenlikler, sonıń menen bir qatarda, jol qoyılǵan qáte-kemshiliklerdi óz waqtında saplastırıw boyınsha professor-oqıtıwshılar menen ushırasıw kestesi tastıyıqlandı.
Usı tiykarda búgin 16-noyabr kúni Yuridika fakulteti professor-oqıtıwshıları menen ushırasıw ótkerildi. Ushırasıwda universitet rektorı A.Reymov, barlıq prorektorlar fakultet dekanı, dekan orınbasarları, kafedra baslıqları hám professor-oqıtıwshıları qatnastı. Dáslep, universitet rektorı A.Reymov sózge shıǵıp, búgingi kúnde, bilimlendiriw sistemasın jaqsılaw onı zaman talapları tiykarında modernizaciyalaw, jaslardı joqarı bilimli, fizikalıq hám ruwxıy bay insan etip tárbiyalaw, bilimlendiriw mákemeleriniń basshı hám pedagog xızmetkerleriniń abıroyın asırıw, olardıń nátiyjeli miynet etiwi ushın Mámleketimiz tárepinen keń múmkinshilikler jaratılıp berilgenligin aytıp ótti.
Sonday-aq, universitetimizdegi sońǵı jılları ámelge asırılıp atırılǵan jumıslar, jetiskenlikler menen mashqalalar, keleshektegi joybarlar haqqında jıynalǵanlarǵa túsindirip ótti. Bunnan soń, Yuridika fakulteti dekanı F.Kutlımuratov fakultette 2021/2022-jıllarda ámelge asırılǵan oqıw processi, ilimiy hám innovaciya isleri, xalıq aralıq birge islesiwler, jaslar menen islesiw, ruwxıy-aǵartıwshılıq jumısları hám aldaǵı (2026-jılǵa shekemgi) perspektivalıq jumıslar haqqında bayanat jasadı.
Ilaj dawamında universitet rektorı A.Reymov fakultette bilimlendiriw procesinde shet el qánigeleri menen birge islesiwler, professor-oqıtıwshılarınıń qánigeligin jetilistiriwi, sonday-aq 2021/2022-jıllarda jaqlaǵan ilim doktorları (DSc, RhD) haqqında toqtalıp, bul boyınsha anıqlanǵan qáte-kemshiliklerdi sınǵa aldı, olardı saplastırıw boyınsha usınısların bildirip, fakultettiń professor-oqıtıwshıları menen ózara pikir alıstı.
QMU baspasóz xızmeti
