Klimat ózgerisi shárayatında tábiyiy resurslardı qorǵaw hám olardan únemli paydalanıw eń aktual máselelerden biri. Mine usı mazmunda Berdaq atındaǵı Qaraqalpaq mámleketlik universitetinde Túslik Aralboyı tábiyiy resurslarınan únemli paydalanıw atamasında X Respublikalıq ilimiy- ámeliy konferenciya bolıp ótti. Konferenciyaǵa Ózbekstan Respublikası Ilimler Akademiyası Qaraqalpaqstan bóliminiń ilimpazları, Qaraqalpaqstanda jaylasqan joqarı oqıw orınlarınıń professor oqıtıwshıları, doktarantlar, magistrantlar, student jaslar hám ǵalaba xabar quralları wákilleri qatnastı. Konferenciyanı Berdaq atındaǵı Qaraqalpaq mámleketlik universiteti rektorı, texnika ilimleri doktorı, professor A.Reymov ashıp berdi hám basqarıp bardı. Konferenciyada házirgi kúnde Túslik Aralboyında tábiyiy resurslardı qorǵaw boyınsha islenip atırǵan jumıslar boyınsha bayanatlar islendi. Atap aytqanda Qaraqalpaq mámleketlik universiteti Ekologiya hám topıraqtanıw kafedrası docenti J.Otewliev Qurǵaǵan Aral ultanında galofit ósimliklerdi tuqımnan hám nálden jetistiriw atamasında bayanat isledi. Konferenciya soraw juwap formasında dawam etip, qatnasıwshılar ózlerin qızıqtırǵan sorawlarına juwaplar aldı. Bunnan soń konferenciya Biologiya fakultetinde dawam etip sekciyalar boyınsha bayanatlar islendi.
