Búgin 23-noyabr kúni Berdaq atındaǵı Qaraqalpaq mámleketlik universiteti Geografiya hám tábiyiy resurslar fakulteti professor-oqıtıwshıları menen ushırasıw ótkerildi. Onda universitet rektorı A.Reymov, barlıq prorektorlar fakultet dekanı, dekan orınbasarları, kafedra baslıqları hám professor-oqıtıwshılar qatnastı.
Ushırasıwda, universitet rektorı A.Reymov sózge shıǵıp, búgingi kúnde, bilimlendiriw sistemasın jaqsılaw onı zaman talapları tiykarında modernizaciyalaw, jaslardı joqarı bilimli, fizikalıq hám ruwxıy bay insan etip tárbiyalaw, bilimlendiriw mákemeleriniń basshı hám pedagog xızmetkerleriniń abıroyın asırıw, olardıń nátiyjeli miynet etiwi ushın Mámleketimiz tárepinen keń múmkinshilikler jaratılıp berilgenligin aytıp ótti.
Sonday-aq, ushırasıwda Geografiya hám tábiyiy resurslar fakulteti dekanı N.Embergenovtıń fakultette 2021/2022-jıllarda ámelge asırılǵan oqıw processi, ilimiy hám innovaciya isleri, xalıq aralıq birge islesiwler, jaslar menen islesiw, ruwxıy-aǵartıwshılıq jumısları hám aldaǵı (2026-jılǵa shekemgi) perspektivalıq jumıslar haqqında bayanatı tıńlandı.
Bunnan soń, rektor A.Reymov fakultette bilimlendiriw procesinde shet el qánigeleri menen birge islesiwler, professor-oqıtıwshılarınıń qánigeligin jetilistiriwi, sonday-aq 2021/2022-jıllarda jaqlaǵan ilim doktorları (DSc, RhD) haqqında toqtalıp, bul boyınsha anıqlanǵan qáte-kemshiliklerdi qatań sınǵa aldı, olardı saplastırıw boyınsha usınısların bildirip, fakultettiń professor-oqıtıwshılarınıń pikir usınısların tıńladı.
QMU baspasóz xızmeti
