Búgin, 30-noyabr kúni Berdaq atındaǵı Qaraqalpaq mámleketlik universitetinde «1-dekabr Qaraqalpaq tiline mámleketlik til biyligi berilgenine 33 jıl tolıwı» múnásibeti menen universitet mádeniyat sarayında «Ana tilim- sen basqadan ayırmam» atamasında bayram keshesi bolıp ótti.

Onda professor-oqıtıwshılar, student-jaslar hám GXQ wákilleri qatnastı. «Ana tilim- sen basqadan ayırmam» atamasındaǵı bayram kesheni universitet rektorı A.Reymov ashıp berdi hám bárshe ilaj qatnasıwshıların bayram menen qızǵın qutlıqladı. Ol óz sózinde búgingi rawajlanıwımızdıń jańa basqıshı – milliy rawajlanıw dáwiri talaplarınan kelip shıǵıp, ana tilimizdiń jámiyettegi ornı hám abırayın arttırıw, qaraqalpaq tiliniń tariyxın tereń úyreniw, onı ilimiy tiykarda hár tárepleme rawajlandırıw boyınsha keń kólemli jumıslar ámelge asırılıp atırılǵanlıǵı, sonday-aq, ana tilimizdi ele de rawajlandırıp, abırayın jáne de arttırıwda, til tazalıǵın saqlaw kerekligin aytıp ótti.

Bunnan soń, Filologiya ilimleriniń doktorı, professor Sh.Abdinazimov shıǵıp sóylep, Qaraqalpaq tiliniń rawajlanıw basqıshları,  keyingi dáwirde qaraqalpaq tili turmısında bir qansha rawajlanıwlar hám jańalıqlar haqqında sóz etti.

 Ilajda universitetimizdiń Qaraqalpaq filologiyası hám jurnalistika fakulteti oqıtıwshısı, Karinform.uz saytı redaktorı,  S.Esemuratova búgingi kúnde Internette qaraqalpaq tilindegi materiallardıń sanın kóbeytiw sonday-aq, qaraqalpaq tilindegi sapalı kontentti jaratıwda redakciyası janınan #KarinformWiki joybarı ámelge asırılǵanlıǵı, bul joybar ana tilimizdiń turmısımızda tutqan ornın hám áhmiyetin jaslarımız sanasına jetkerip beriwde ayırıqsha áhmiyeti haqqında bayanat jasadı.

Sonıń menen birge ilajda 1-dekabr Qaraqalpaq tiline mámleketlik til biyligi berilgenligine 33 jıl tolıwı múnásibeti menen universitettiń student-jasları arasında «Sahra búlbilleri» atamasında qaraqalpaq tiliniń táriyiplewge arnalǵan jas shayırlar tańlawı jeńimpazların sıylıqlaw bolıp ótti. 

Til bayramına arnalǵan ilaj student jaslar tárepinen tayarlanǵan koncert baǵdarlaması menen dawam etti.

QMU baspasóz xızmeti