Búgin Berdaq atındaǵı Qaraqalpaq mámleketlik universitetinde «Mámleketlik tilde is júritiw» kitabınıń prezentaciyası bolıp ótti. Onda Ózbekstan Respublikası Ministrler Kabinetiniń Ruwxıylıq hám mámleketlik tildi rawajlandırıw máseleleri departamentiniń baslıǵı S.Shukurov, Ózbek tilin rawajlandırıw fondı atqarıwshı direktorı A.Eminov Mámleketlik tilde is júrgiziw hám kadrlar qánigeligin arttırıw orayı Qaraqalpaqstan Respublikası aymaqlıq bólimi baslıǵı, filologiya ilimleri kandidatı docenti F.Babajanov, Nókis qalasında hám rayonlıq mákeme, shólkemlerden wákiller qatnastı. Ilajdı universitet rektorı A.Reymov ashıp berdi hám basqarıp bardı.
Dáslep, rektor A.Reymov ana tilimizdiń jámiyettegi ornı, onı ilimiy tiykarda hár tárepleme rawajlandırıw boyınsha búgingi kúnde keń kólemli jumıslar ámelge asırılıp atırǵanlıǵı, sonday-aq, Qaraqalpaqstan Respublikası Joqarı Keńesiniń Prezidumınıń 2021-jıl 16-iyulda qabıllanǵan 410-sanlı «Qaraqalpaq tilin jáne de rawajlandırıw hám til siyasatın jetilistiriw ilajları haqqında» ǵı mámleketlik til boyınsha qollanbalar islep shıǵılıwı belgilenip, usı tiykarda jańa redakciyadaǵı «Mámleketlik tilde is júritiw» kitabı onıń keń jámiyetshilikke áhmiyeti haqqında aytıp ótti.
Bunnan soń, Ózbekstan Respublikası Ministrler Kabinetiniń Ruwxıylıq hám mámleketlik tildi rawajlandırıw máseleleri departamentiniń baslıǵı S.Shukurov sózge shıǵıp, jıynalǵanlardı «1-dekabr Qaraqalpaq tiline mámleketlik til biyligi berilgenine 33 jıl tolıwı» múnásibeti menen qızǵın qutlıqlap, «Mámleketlik tilde is júritiw» kitabınıń áhmiyeti haqqında aytıp ótti. Sonıń menen birge ilajda sózge shıqqanlar, jańa kitaptıń is júrgiziw tili hám stili, hújjet túrleri hám ózgeshelikleri, hújjetlerdegi zárúrli bólimler (rekvizitler) hám olardı rásmiylestiriw boyınsha tiykarǵı mazmunı haqqında aytıp, jıynalǵanlarǵa keń túrde maǵlıwmat berdi. Haqıyqatında da bul «Mámleketlik tilde is júritiw» kitabı kárxana, mákeme hám shólkem basshıları hám xızmetkerleri, basqarıw xızmetinde tikkeley hújjet ústinde islewshiler, xatker-referentler, kadrlar jumısı xızmetkerleri, esapshılar, ádillik másláhátshileri, auditorlar, menedjerler jumıs babında paydalanıwda áhmiyetli bolıp esaplanadı. Ilaj dawamında óz jumısına juwapkershilik penen jantasıp atırǵan rayon hakimlikleriniń hám shólkemlerdiń til boyınsha másláhátshilerine hám qaraqalpaq tili professor-oqıtıwshılarına estelik sawǵaları tapsırıldı.
QMU baspasóz xızmet
