Búgin Berdaq atındaǵı Qaraqalpaq mámleketlik universitetide Ózbekstan Respublikası Konstituciyasınıń qabıl etilgenliginiń 30 jıllıǵı múnásibeti menen ilaj bolıp ótti. Onda Qaraqalpaqstan Respublikası Joqarǵı Keńesi baslıǵınıń orınbasarı R.Saparbaev, Qaraqalpaqstan Respublikası sudı baslıǵı, K.Tarixov, Qaraqalpaqstan Respublikası prokurorınıń orınbasarı E.Qayıpbergenov hám universitetimizdiń professor-oqıtıwshılar, student-jaslar qatnastı. Ilajdı universitet rektorı A.Reymov ashıp berdi hám basqarıp bardı. Dáslep ilaj Ózbekstan hám Qaraqalpaqstan Respublikalarınıń mámleketlik gimnleri menen baslandı.
Bunnan soń, Qaraqalpaqstan Respublikası Joqarǵı Keńesi baslıǵınıń orınbasarı R.Saparbaev, sózge shıǵıp, Bársheni Ózbekstan Respublikası Konstituciyasınıń qabıl etilgenliginiń 30 jıllıǵı menen qızǵın qutlıqlap, Ózbekstan Respublikasınıń dúnya siyasiy maydanında ǵárezsiz mámleket sıpatında óz ornına iye bolıwı, rawajlanıw jolın belgilep, jıldan-jılǵa abırayınıń artıp barıwı sonday-aq, xalıqtıń párawanlıǵın támiyinlewde – Konstituciyanıń ornı hám áhmiyeti joqarı ekenligin aytıp ótti.
Sonıń menen birge ilajda Qaraqalpaqstan Respublikası sudı baslıǵı, K.Tarixov, Qaraqalpaqstan Respublikası prokurorı orınbasarı E.Qayıpbergenovlar sózge shıǵıp Konstituciya mámlekettiń tiykarǵı nızamı bolıp, hár bir mámlekettiń keleshegi usı hújjette óz sáwleleniwin tabqanlıǵın aytıp, búgin elimizde júz berip atırǵan jańalanıwlar, demokratiyalıq huqıqıy mámleket qurıw, ádil puqaralıq jámiyetin qáliplestiriw jolında erisip atırǵan jetiskenliklerimizdiń barlıǵı Konstituciyada kórsetilgen tiykarǵı principlerdiń turmısqa tolıq engiziliwi menen baylanıslı ekenligin óz bayanatlarında keltirip ótti.
Sonday-aq, Qaraqalpaq mámleketlik universitetiniń «Insan huqıqları, mámleketlik huqıq hám basqarıw» kafedrası professorı, yu.i.d. E.Qutıbaeva «Ózbekstan Respublikası Konstituciyası – ullı keleshegimiz kepili» hám universitetimizdiń yurisprudenciya qánigeligi 2-kurs studenti D.Egamberdiev «Ózbekstan Respublikası Konstituciyası – jaslar siyasatın ámelge asırıwdıń huqıqıy tiykarı» temalarında bayanat jasadı.
Ilaj dawamında Qaraqalpaqstan Respublikası Joqarǵı Keńesi baslıǵınıń orınbasarı R.Saparbaev, Qaraqalpaqstan Respublikası sudı baslıǵı, K.Tarixov, Qaraqalpaqstan Respublikası prokurorı orınbasarı E.Qayıpbergenovlar “Jasıl mákan” ulıwma milliy joybarı tiykarında universitetimiz átirapına dekorativ terek nállerin otırǵızıp, Watanımızdı jasıl mákanǵa aylandırıwda bársheni belsendilikke shaqırdı.
QMU baspasóz xızmeti
