Búgin 3-dekabr kúni  Berdaq atındaǵı Qaraqalpaq mámleketlik universiteti hayal-qızlar keńesi hám Qaraqalpaqstan Respublikası Shańaraq hám hayal-qızlar komiteti sonday-aq, QR IIMniń  tiyisli qánigeleri tárepinen universitet studentler turar úyinde jasawshı student-qızlardıń jasaw sharayatları úyreniw maqsetinde sáwbetlesiw ótkerildi.

 Bul sáwbetlesiw keshesine Qaraqalpaqstan Respublikası Shańaraq hám hayal-qızlar komiteti baslıǵınıń orınbasarı G.Xalmuratova, Qaraqalpaqstan Respublikası IIM jámiyetlik qáwipsizlik bólimi  huqıqbuzarlıqlar profilaktikası basqarması baslıǵı orınbasarı, podpolkovnik H.Reymkulova, Qaraqalpaqstan Respublikası Shańaraq hám hayal-qızlar komitetiniń bas qánigesi B.Jaqsımuratova, universitet rektorınıń hayal-qızlar máseleleri másláhátshisi I.Seytnazarova, fakultetlerdegi hayal-qızlar máseleleri boyınsha dekan másláhátshileri hám studentler turar úyinde jasawshı student qızlar qatnastı.

Sáwbetlesiw barısında taraw qánigeleri student qızlarǵa búgingi kúnde mámleketimizde hayal- qızlarǵa, ásirese joqarı oqıw orınlarında oqıp, bilim alıp atırǵan qızlar ushın jaratılıp atırǵan keń múmkinshilikler, sharayatlar, imkaniyatlar haqqında aytıp ótti. Bunnan soń, QR IIMnen kelgen qánige H.Reymkulova sońǵı waqıtlarda  hayal- qızlar arasında júz berip atırǵan jınayatshılıq hám huqıqbuzarlıqlardın aldın alıw, olardı boldırmaw  boyınsha student qızlarǵa óziniń paydalı  másláhátlerin berip, student qızlarmızdın mashqala hám pikir usınısların tıńladı.

Sonıń menen birge, studentler turar úyinde jasawshı student qızlardıń jasaw sharayatları menen, bólmeleriniń tazalıǵı, olardıń bos waqtın mazmunlı ótkeriw boyınsha hayal-qızlar keńesi janında studentler turar úyiniń ózinde dúzilgen «Qızlarjan» klubı, «Sheber qollar» tigiwshilik dógerekleri, «Aspazlıq sırları» hám t.b. klub hám oraylardıń jumısı menen tanıstı.

     QMU Hayal- qızlar Keńesi