Biologiya fakultetinde pitkeriwshi kurs jas ekologstudentler hám professor-oqıtıwshıları, sonday-aq, Respublikamızdaǵı bir qatar mekemeler wákilleri menen ushırasıw bolıp ótti. Ushırasıwda “Ekologiya hám topıraqtanıw” kafedrası baslıǵı M.Allamuratov, professor-oqıtıwshılar hám student-jaslar, sonıń menen birge, Qaraqalpaqstan Respublikası Qorshaǵan ortalıqtı qorǵaw komitetinen B.Ibragimov, «Qubla Ústyurt milliy tábiyat baǵı»nan S.Tilewmuratov,  Saygachiy kompleks (landshaft) buyırtpa qorıqxanasınan B.Smaylov, Tómengi Ámiwdárya mámleketlik biosfera rezervatınan G.Matrasulov, QR Suw xojalıǵı qasındaǵı   meliorativ ekspeditsiya mekemesinen R.Dáwletbaeva hám Sh.Narımbetovlar qatnastı.

Ushırasıwdı Biologiya fakulteti oqıw isleri boyınsha dekan orınbasarı Q.Qaypov ashıp berdi hám alıp bardı. Ushırasıw barısında Ekologiya hám qorshaǵan ortalıqtı qorǵaw hám topıraqtanıw tálim baǵdarlarında ótilip atırǵan pánler, olardıń ámeliyatları, 2022/2023 oqıw jılında pitkeriwshiler hám olardıń bántligin táminlewde itibarǵa alınıwı kerek bolǵan máseleler haqqında maǵlıwmatlar berildi. Mekeme hám shólkemlerdiń jumıs jaǵdayınan kelip shıǵıp, keleshekte ayrım pánlerdiń oqıw rejelerine jergilikli mashqalalar, olardıń sheshimi, úyreniliw barısın jarıtıp beretuǵın maǵlıwmatlar kiritiliwi kerekligi haqqında sóz etildi.