Búgin Berdaq atındaǵı  Qaraqalpaq mámleketlik universitetinde «Qaraqalpaqstan Respublikasına xızmet kórsetken arxitektor», Orınbay Tóreniyazovtıń 80 jıllıq yubileyine bagıshlanǵan eslew keshesi bolıp ótti.

Onda bir qatar miymanlar prorektorlar, professor-oqıtıwshılar, nuraniy ustazlar hám student-jaslar qatnastı. Ilajdı universitetimiz Jaslar máseleleri hám ruwxıy-aǵartıwshılıq isleri boyınsha prorektor S.Alauatdinov ashıp berdi hám jıynalǵanlardı óz xalqına sadıqlıq, pidayılıq penen xızmet etiwdi baxıt dep bilgen kóplegen jaslardıń ustazı, óz isiniń haqıyqıy pidayısı bolǵan insan Orınbay Tóreniyazovtıń búgingi 80 jıllıq yubileyi menen universitetimiz jámááti atınan qızǵın qutlıqladı.

Bunnan soń sózge shıqqanlar bul insannıń ómir jolı dóretiwshıligi sonday-aq, derlik 50 jıllıq dóretiwshilik miynet jolı dawamında Mámleketimizdiń kórkeyiwine, paytaxtımız Nókis qalası hám rayonlarımızda xalqımızdıń iygiligine xızmet etetuǵın bir-birinen shıraylı imaratlardıń boy tiklewine, bir neshe arxitektorlardıń jetilisip shıǵıwına úlken úles qosqan insan ekenin aytıp ótti.

Sonıń menen birge ótkerilgen keshe dawamında  Orınbay Tóreniyazov atındaǵı innovciyalıq muzeydiń saltanatlı ashılıwı bolıp, ol jerde kelgen miymanlar Orınbay Tóreniyazovqa tiyisli buyımlar kitaplar, foto suwretler, sonday-aq, óz qolı menen dóretken arxitekturalıq obyektlerdiń sızılmaları máketlerin tamashaladı.

Maǵlıwmat ushın Orınbay Tóreniyazov Berdaq atındaǵı mámleketlik sıylıqtıń laureatı, «Qaraqalpaqstan Respublikasına xızmet kórsetken arxitektor», «Ózbekstan Respublikasına 10 jıl» kókirek nıshanı, Ózbekstan «Mehnat fahriyi» gúmis medalı menen sıylıqlanǵan.

QMU baspasóz xızmeti