Búgin Berdaq atındaǵı Qaraqalpaq mámleketlik universitetinde «Ataqlı mámleketlik ǵayratker, Ózbekstan Qaharmanı Musa Tajetdinovich Erniyazov – jaslar qálbinde» atamasında eslew keshesi bolıp ótti. Onda professor-oqıtıwshılar, nuraniylar, student-jaslar qatnastı. Ilajdı universitetimizdiń Xalıqaralıq birge islesiw boyınsha prorektorı T.Nurımbetov ashıp berdi hám basqarıp bardı.
Ol óz sózinde Pútkil ómirin Qaraqalpaqstan Respublikasın hár tárepleme rawajlandırıwǵa baǵıshlaǵan, bilim hám tájriybesin, pidayılıǵın usı jolda jumsaǵan haqıyqıy márt, qaharman insan 2002-2020-jıllar aralıǵında Qaraqalpaqstan Respublikası Joqarǵı Keńesiniń Baslıǵı – Ózbekstan Respublikası Oliy Majlisi Senatı Baslıǵınıń orınbasarı lawazımında islegen Musa Tajetdinovich Erniyazovtıń miynet jolı dawamında elimizdin sociallıq, ekanomikalıq hám mádeniy jaqtan gúllep- rawajlanıwdaǵı xızmetleri haqqında sóz etti.
Sonıń menen birge Musa Erniyazovtıń respublikamızda ilim hám bilimlendiriw tarawına da ayrıqsha itibar qaratqanlıǵı, ásirese jaslardı qollap-quwatlap, olarǵa qol-qanat bolıp sonday-aq, xalqımızdıń tınıshlıǵın, awız birshiligin hám turaqlılıǵın támiyinlewde múnásip jol basshılıq etken Musa Erniyazovtıń 75 jıllıǵı múnısibeti menen universitetimiz jámááti atınan qızǵın qutlıqlap, onıń talapshańlıǵı, pidayılıǵı islegen qayırlı isleri, keleshek áwladtıń máńgi yadında saqlanıp qalatuǵındıǵın aytıp ótti.
Bunnan soń, sózge shıqqanlar Musa Tajetdinovich Erniyazovtıń ómir bayanı menen birge, miynet jolı, onıń tikkeley basshılıǵında Qaraqalpaqstan Respublikasın social-ekonomikalıq rawajlanıwlar, Aral boyındaǵı ekologiyalıq jaǵdaydı jaqsılaw, xalıqtıń turmıs dárejesin arttırıw boyınsha úlken dóretiwshilik hám abadanlastırıw jumısları ámelge asırılǵanlıǵın ásirese, kekse áwlad wákilleri, miyriban apa-sińlilerimiz, áziz jaslarımızdıń turmıs hám miynet sharayatların jaqsılaw, olardıń múnásip keleshegin támiyinlew jolında ayrıqsha belsendilik kórsetip, shın kewilden xızmet islegenligi haqqında óz bayanatlarında keltirip ótti. Ilajda Ózbekstan Qaharmanı Musa Tajetdinovich Erniyazovtıń ómiri hám miynet jolı haqqında hújjetli film qoyıp jıynalǵanlardıń názerine usınıldı.
Haqıyqatında da Watanın shın mánide hesh qanday máp gózlemey súyetuǵın, xalqına sadıqlıq, pidayılıq penen xızmet etiwdi baxıt dep bilgen óz isiniń haqıyqıy pidayısı bolǵan insan Xalqımızdıń ullı perzenti, belgili mámleketlik hám jámiyetlik ǵayratker Musa Tajetdinovich Erniyazovtıń islegen iygilikli isleri hesh qashan umıtılmaydı, biziń qálbimizde máńgi saqlanıp qaladı.
QMU baspasóz xızmeti
