Usı jıldıń 20-dekabr kúni Ózbekstan Respublikası Innovaciyalıq rawajlanıw ministrliginde «Young Scientists Alumni Reunion 2022» atamasında májilisi bolıp ótti. Ózbekstan Respublikası Innovaciyalıq rawajlanıw ministrligi Ilim-pándi qarjılandırıw hám innovaciyalardı qollap-quwatlaw fondı direktorı B.Oxunov sózge shıǵıp, búgin kúnde Ózbekstan Respublikası Prezidenti Shavkat Mirziyoevtıń jas ilimpazlarǵa ayrıqsha itibar hám kómek beriwde tapsırılǵan wazıypalardıń búgingi kúnge shekem ámelge asırılǵan jumısları boyınsha maǵlıwmat berdi. Atap aytqanda, jas ilimpazlardıń stajirovkaǵa jiberiliwi boyınsha esabat prezentaciyasın ótkerdi.
Sonday-aq, 2018 jıldan házirge shekem jámi 471 jas ilimpazlardı Rossiya, Belorusiya, AQSh, Germaniya, Ullı Britaniya, Qubla Koreya hám Izrail sıyaqlı 30 dan artıq jetekshi shet el mámleketlerine ilimiy stajirovkalarǵa jiberilip, stajirovkalar dawamında óz tarawınıń ustaları menen sheriklikte ilimiy izertlewler alıp barıp, óz ilmiy tájriybe hám kónlikpelerin arttırıw hám de shet el ilimiy institutlar menen sheriklik baylanısların bekkemlewge erispekte.
Bunnan tısqarı, ilaj dawamında Fond tárepinen shólkemlestirilgen ilimiy stajirovkalar boyınsha regionlar kesiminde 7 aǵzadan ibarat koordinatorlar belgilendi. Bul koordinatorlardıń wazıypası, keleshekte stajirovka ótew ushın baratırǵan jas ilimpazlarǵa shólkemlestiriwshilik hám ilimiy máselelerde óz tájiribasinen kelip shıǵıp másláhátler beriw hám jol-jobalar kórsetiwden ibarat.
Májiliste 2018-2022-jıllarda shet ellerde ilimiy stajirovka atqarıp kelgen jas alımlar qatarında Berdaq atındaǵı Qaraqalpaq mámleketlik universitetinen «Fizika hám kolloid ximiya» kafedrası docenti A.Pirniyazov hám «Arxeologiya» kafedrası assistenti M.Tolıbaevlar da qatnasıp, óz tájiriybelerin ortaqlastı. Sonday-aq, ilajda shet elli belgili alımlar da “online” tárizde óz bayanatları menen qatnasıp, sáwbet pikir hám usınıslarǵa bay tárizde ótkerildi. Ilaj sońında, 2022 jılda ótkerilgen tańlawlarda jeńimpaz bolǵan 326 jas ilimpazlarǵa arnawlı sertifikatlar tapsırıldı.
