Búgin Berdaq atındaǵı Qaraqalpaq mámleketlik universitetinde Ózbekstan Respublikası Prezidentinıń 2022-jıl 20-dekabr kúngi Oliy Majliske hám Ózbekstan xalqına jollaǵan Múrájatınıń mazmunı hám áhmiyetin keń jámiyetshilikke jetkeriw maqsetinde seminar bolıp ótti. Onda Ózbekstan Respublikası Oliy majlis Senatı aǵzası, B.Matmuratov, Qaraqalpaqstan Respublikası Joqarǵı Keńes komitet baslıǵı Sh.Ótemisov, Qaraqalpaqstan Respublikası Joqarǵı Keńes deputatı T.Romanov, universitet rektorı A.Reymov hám professor-oqıtıwshılar, tyutorlar qatnastı.

Seminarda dáslep, Qaraqalpaqstan Respublikası Joqarǵı Keńes deputatı, universitet rektorı A.Reymov jıynalǵanlarǵa múrájatnamada Mámleketimiz Prezidenti tárepinen 2023-jılda ámelge asırılatuǵın baslı baǵdarlar, ásirese bilim sapasın arttırıw, jaslarǵa zamanagóy hám sapalı bilim beriw máselesine ayırıqsha itibar qaratqanlıǵın aytıp ótti.

Bunnan soń, Ózbekstan Respublikası Oliy majlis Senatı aǵzası, B.Matmuratov, Qaraqalpaqstan Respublikası Joqarǵı Keńes komitet baslıǵı Sh.Ótemisov, Qaraqalpaqstan Respublikası Joqarǵı Keńesi deputatı T.Romanov sózge shıǵıp, Húrmetli Prezidentimiz Mámleketimiz rawajlanıwın jańa basqıshqa alıp shıǵıw ushın «Aldın – insan, keyin – jámiyet hám mámleket» degen ideyanı alǵa súrgenligin sonday-aq, 2023-jılǵa «Insanǵa itibar hám sapalı bilimlendiriw jılı» dep atama beriliwi Mámlekettiń tiykarǵı baylıǵı esaplanǵan insanǵa itibar, sol mámlekettiń aldaǵı jarqın kelesheginen dárek beretuǵınlıǵın aytıp ótti. Sonıń menen birge, seminarda universitetimizdiń professor-oqıtıwshılar tárepinen arnawlı slaydlarda túsindirilip, keń túrde maǵlıwmatlar berildi.

QMU baspasóz xızmeti