Ózbekstan Respublikası Prezidenti Sh. Mirziyoevtiń 2022-jıl 20-dekabrdegi Oliy Majliske hám Ózbekstan xalqına múrájatnaması mámleketimizdiń strategiyalıq baǵdarların belgilep berdi. Bul múrájatnamanı xalqımız úlken qızıǵıwshılıq penen tıńladı. Óytkeni bundaǵı hár bir másele hár bir puqaranıń ómirine, turmısına, búgini hám keleshegine tiyisli. Prezidentimiz sóziniń basında kelesi jılǵa rejeler dúziw ushın xalqımız tárepinen kelip túsken 20 mıńǵa jaqın pikir hám usınıslar analiz qılınǵanlıǵın, bular tiykarınan medicina, bilimlendiriw hám sociallıq rawajlanıw máselelerinen ibarat ekenligin aytıp ótti. Shınında da sońǵı jıllarda xalqımız hár qanday nızam joybarlarınıń, mámleketlik baǵdarlamalardıń islep shıǵılıwına biyparıq emes. Sol qatarda Prezidentimizdiń Oliy Majliske múrájatı tayarlıǵı dáwirinde de elimizdiń túrli tarawlarında ámelge asırılıwı tiyis bolǵan is-ilajlar júzesinen óz pikir-usınısların bildiriwleri xalqımızdıń jámiyetlik turmısta belsendiliginiń artıp baratırǵanlıǵınan derek beredi.
Múrájatnamada Prezidentimiz tárepinen altı tiykarǵı baǵdarlar belgilep berilip, hár bir baǵdar boyınsha 2023-jılda ámelge asırılıwı tiyis bolǵan ámeliy is-ilajlar kórsetilgen. Solardıń ishinde tálim-tárbiya máselesi ayrıqsha áhmiyetke iye. Bilimlendiriw tarawınıń sapa kórsetkishin dáwir talabı dárejesine kóteriwge erisilse hár bir tarawdıń jumıs nátiyjeliligi artadı. Usı kóz qarastan Prezidentimiz Múrájatnamada bir qatar tarawlar menen birge bilimlendiriw tarawında ámelge asırılıwı tiyis bolǵan máselelerge toqtalıp, «Tálim, tálim, tálim hám taǵı bir ret tálim. Men altı jıl aldın sol máselelerge tereń itibar etip, birinshi kúnnen beri tálimimiz haqqında kóp aytaman. Eger tálim bolsa, bilim bolsa, sapa ózgeredi. Tálim bolmasa, sapa ózgermese, itibar da ózgermeydi», —dep uqtıradı.
Sońǵı jıllarda oqıtıwshılardıń, tárbiyashılardıń sociallıq jaǵdayların jaqsılawǵa qaratılǵan bir qansha is-ilajlar ámelge asırılıp, olardıń turaqlılıǵın támiynlew maqsetinde bir qatar húkimet Qararları qabıl etildi. Shavkat Mirziyoev mekteptegi oqıtıw sapasına sın kóz benen qarap, «Repetitor shet tillerin bir jılda úyretedi, mektepte nege bala on jılda da jeterli úyrenbeydi?» degen júdá orınlı sorawdı qoydı. Bul tek bir pán mısalında aytılǵan sın pikir edi. Bunday jaǵday basqa pánlerdiń oqıtılıwında da ushırasatuǵını sır emes, álbette. Sonlıqtan tárbiyashılar, oqıtıwshılar bilimlendiriwdiń sapasın asırıwdı ózin-ózi oqıtıwshı sıpatında jetilistiriwden baslawı tiyis. Jáne bir ayrıqsha itibarǵa ılayıq másele – 2023-jıldan baslap mektep bilimlendiriwin xalıqaralıq bilimlendiriw baǵdarlamaları tiykarında pútkilley reformalawdı baslanadı. Bul jumıslardı sistemalı jolǵa qoyıw, jańa sabaqlıqlardı islep shıǵıw, aldıńǵı bilimlendiriw standartların hám metodikaların engiziwge óz aldına ilimiy institut hám laboratoriyalar shólkemlestiriledi. Bul ilajlar oqıtıwshınıń tiykarǵı tayanıshı bolǵan oqıw quralları sapasınıń artıwına tiykar boladı.
Prezidentimiz óz sózinde ustaz hám shákirt ortasındaǵı múnásibet máselesine de ayrıqsha itibar qaratıp, oqıtıwshı hám tárbiyashılardıń «abıroyı ornına qoyılsa», mektepler, mektepge shekem bilimlendiriw mekemeleri hám joqarı oqıw ornılarda sapa ózgerisleri ámelge asırılsa, «pútkil háreketlerimiz eki-úsh ese ózgeriwi»n aytıp ótti. Bul biz pedagoglardıń aldına jańa wazıypalardı, jańa talaplardı qoyadı. Olardıń orınlanıwı bolsa pedagoglardıń sheberligine, pidayılıǵına, ilimiy potencialına baylanıslı. Sonlıqtan Prezidentimizdiń múrájatnamasında bilimlendiriw tarawına tiyisli belgilep berilgen wazıypalardı sapalı orınlaw maqsetinde hár bir pedagog óziniń pedagogikalıq sapasın arttırıwda at salısıwı tiyis. Óytkeni pedagog tınımsız óz ústinde islep, zaman menen teń qádem baspasa, óz bilimin, metodikasın jetilistirip barmasa, oqıtıwshı sıpatında abıroyǵa erisiwi múmkin emes.
Professor A.T.Matchanov
