Búgin Ózbekstandaǵı Erasmus+ Milliy Ofisiniń shólkemlestiriwinde Qaraqalpaqstandagı joqarı oqıw orınları ushın málimleme webinarı bolıp ótti. Onlayn formatta ótkerilgen webinarǵa Qaraqalpaqstandaǵı joqarı oqıw orınlarınıń xalıq aralıq bólimleri baslıqları menen oqıw orınlarıńıń professor-oqıtıwshıları qatnastı.

Ilajdı Erasmus+ Milliy ofisiniń joybarlar menejeri Gulshada Qarlibaeva alıp bardı. Dáslep ol ózi “Erasmus+ baǵdarlaması múmkinshilikleri: Joqarı bilimlendiriwde múmkinshiliklerdi jetilistiriw, Xalıq aralıq Kredit mobilligi, Jean Monnet baǵdarları” degen temada bayanatı menen jıynalǵanlarǵa málimleme jetkerdi. Milliy ofistiń joybarlar basqarıwshısı Bonu Abdusalomova bolsa, “Erasmus+ baǵdarlaması múmkinshilikleri: Erasmus Mundus Design ólshemleri, Erasmus Mundus qospa magistraturalar” degen temada prezentaciya isledi.

Bunnan soń, ámeliy tústegi prezentaciyalarǵa náwbet berildi. QMUdıń geografiya kafedrası docent Yaxshımurat Xudaybergenov “DSinGIS” joybarındaǵı nátiyjeler haqqında, TATUdıń Nókis filialı kafedra baslıǵı Asiya Tóreniyazova“RUECVET” joybarı negizindegi tabıslarǵa toqtaldı.

QMU dıń jurnalistika kafedrası docent Baxıtbay Paluanov Qaraqalpaqstandaǵı joqarı oqıw orınlarında orınlanıp atırǵan Xalıq aralıq mobillik grantları haqqında prezentaciya isledi hám Qaraqalpaq mámleketlik universiteti hám Qaraqalpaqstan awıl xojalıǵı hám agrotexnologiyalar institutında orınlanıp atırǵan grantlardıń nátiyjeleri haqqında maǵlıwmatlar keltirip, tájiriybelerin webinar qatnasıwshıları menen bólisti.

Webinar sońında qatnasıwshılar tárepinen sorawlar berilip, olarǵa bayanatshılar juwaplar berdi.

Abdikadir Nurlıbaev,

QMUdıń málimleme xızmeti bilim baǵdarınıń 1-kurs studenti