Ótken 2022-jıl 20-dekabr kúni Prezidentimiz hár jılı dástúrge aylanǵan Oliy majlis hám xalıqqa óz múrájatın jolladı. Jurt basshımız óz sózinde ótken jılda erisken jetiskenliklerimizdi, rawajlanıwlardı anıq sanlar negizinde atap ótti. Insan qádri hár dayım baslı máselelerden bolsa, qalǵan máseleler óz sheshimin tabadı degen ideyanı alǵa súrdi. Húrmetli Prezidentimiz aytqanınday haqıyqatında da «Biziń Watanımızdı hesh kim sırttan kelip rawajlandırıp ketpeydi». Bunıń ushın ózimiz háreketimizdi qılıwımız kerek hám bul jolda kóplegen tapsırmalar hám usınısların berip ótti.
Prezidentimiz óz sózinde ótken 2022-jıl Respublikamızda 197 dana iri, mıńlaǵan kishi hám orta kárxanalar hámde infrastruktura obyektleri qurıp pitkerilgenligine, sonıń ishinde, “Navoiyazot”ta ammiak hám karbamid óndirisi kompleksi hámde azot kislotası cexı, Mubarek, Gazli hám Shortan neft-gaz kárxanalarında suyılttırılǵan gaz islep shıǵarıw qurılmaları, Tashkent metallurgiya zavodı sıyaqlı iri quwatlı óndirisler iske túskenligine toqtalıp ótti.
Jurt basshımız óz múrájatında sanaat tarawına itibardı ele de kúsheytiwdi, Respublikmızǵa kelesi jıllardı kóbirek shet el invisticiyaların qamırap alıw, bul tarawlarda isbilermenlerge keń imkaniyatlar jaratıw boyınsha usınısların berdi. Bilimlendiriw sistemasına da ayrıqsha toqtalıp, ulıwma bilim beriw mekteplerindegi bilimlendiriw sapası paytaxtta da, alıs awıllarda da bolıwı shárt ekenligin aytıp ótti.
Jıl atamasınıń «Insanǵa itibar hám sapalı bilimlendiriw» jılı dep belgileniwi bizlerge úlken quwanısh hám juwapkershilikti sezindiredi. Al oqtıwshılardıń haq-huquqları konstituciya menen qorǵalıwı bolsa misli kórilmegen jańalıqlardan biri boldı desem asıra aytqan bolmayman. Bul nızam hám qararlardıń ámelde óz tastıyǵın tabıwında hár bir jámiyet wákiliniń ornı girewli.
Haqıyqatında da rawajlanıwǵa tek ǵana joqarı dárejeli bilim hám ilimniń arqasında jetisemiz. Keleshegimizdiń aydın bolıwında tikkeley sapalı bilim, ilim menen qurallanǵan jaslarǵa baylanıslı. Joqarı bilimlendiriwge jaslardı qamtıp alıwǵa hám bilimniń sapasın asırıwǵa ayrıqsha itibar qarattı. Keyingi jıldan baslap joqarı bilimlendiriwge ajratılatuǵın mámleket grantları sanı keminde 25 procentke asırılıwı, joqarı oqıw orınlarına qabıllawda mútajligi bar shańaraqlar qızları ushın grantlar sanın 2 esege kóbeytip, onı 2 mıńǵa jetkiziw, ayrıqsha bahalarǵa oqıp atırǵan, sociallıq qorǵawǵa mútáj qızlar ushın arnawlı stipendiyalar engiziliwi haqqında toqtalıp ótti.
Házirgi waqıtta jaslar eń abıraylı joqarı oqıw ornılarǵa oqıwǵa kiriw ushın umtıladı, lekin joqarı oqıw orınları arasında bilimli hám intalı jaslardı tartıw boyınsha báseki joq. Usınıń sebebinen jeke joqarı oqıw ornılarǵa da zárúr qánigelerdi tayarlaw boyınsha mámleket buyırtpası beriw sisteması jolǵa qóyıladı.
Joqarı oqıw ornıları hám bilimlendiriw sistemasınıń tómen buwınları arasındaǵı úziliksizlikti kúsheytiw maqsetinde 65 akademikalıq licey joqarı oqıw orınları ıqtıyarına ótkeriledi. Sonıń menen birge, 187 texnikum da óz baǵdarı boyınsha túrles joqarı oqıw ornı hám tarmaq kárxanalarına biriktiriledi. Abıraylı shet el universitetleri, ilimiy hám innovaciyalıq oraylar menen baylanıslardı kúsheytiw, olar menen kadrlar tayarlaw boyınsha sheriklikti jáne de keńeytiwimiz zárúr ekenligin atap ótti.
Ol ushın eń tuwrı jol dep insannıń ilimli, kásip-ónerli bolıwın, tuwri sheshim dep bilemen, al bilimli, ilimli hám ónerli insan bolsa ómirde óz jolın tawıp ketiwi sózsiz.
QMU Sanaat texnologiyası fakulteti dekanı R.Qurbaniyazov
