Ózbekstan Prezidentiniń Oliy Majliske múrájatnaması – mámleket siyasiy turmısındaǵı eń áhmiyetli waqıya bolıp esaplanadı. Ózbekstan Respublikası Prezidentiniń Oliy Majliske Múrájatnama menen shıǵıwı dáslepki mártebe 2017-jıl dekabr ayında engizilgen bolıp, usı múrájatnamada kóterilgen máseleler hár jılı jámáátshilik itibarın tartpaqta. Mámleketimiz basshısı hár jılı parlamentke jollaǵan Múrájatnamasında ótken jıldıń kórsetkishlerin járiyalaydı, respublikanı rawajlantırıwdıń tiykarǵı jónelislerine ayrıqsha itibar qaratadı, kelesi jıl ushın maqset hám wazıypalardı belgilep beredi.
Mámleketimiz basshısınıń Oliy Majlis hám Ózbekstan xalqına Múrájatnamasın tıńlar ekenbiz, hár birimiz qálbimizde Ana Watanımızǵa muhabbat, óz wazıypamızǵa juwapkershilikli bolıw, jámiyetimizge óz úlesimizdi qosıwday sezimlerdi qálbimizde oyatadı.
Prezidentimiz óz Múrájatnamasında «Dáslep – insan, keyin – jámiyet hám mámleket» degen ideyanı Konstituciyamız hám nızamlarımızǵa da, kúndelikli turmısımızǵa da tereń sińdiriwimiz kerek, degen pikirdi alǵa súredi. Bul bolsa, óz náwbetinde, Ózbekstanda alıp barılıp atırǵan mámleket sıyasatınıń orayında insan hám onıń máplerin támiyinlewdi ústin wazıypa etip belgilegenin kórsetip turıptı.
Mámleketimiz basshısı Múrájatnamada ıqsham hám nátiyjeli mámleket basqarıw sistemasına ótiwi, Jańa Ózbekstandı «sociyallıq mámleket» principi tiykarında qurıw, tálim-tárbiya tarawın jańa basqıshqa kóteriw, isbilermenlik subektlerine jańa imtiyazlar beriw, olardı qollap-quwatlaw, sud-huqıq sistemasın jáne de reformalaw, energetika tarawında ózgerisler qılıw júzesinen áhmiyetli bolǵan jónelislerdi belgilep berdi.
Xalqımızdıń erteńgi kúni, mámleketimizdiń rawajlanıwı ushın, dáslep tálim-tárbiya tarawı áhmiyetli rol oynaydı. Sebebi barlıq maqsetlerge bilim hám tárbiya arqalı erisiledi.
Mámleketimiz basshısı óz pikirlerin dawam ettiriw processinde bilimlendiriw tarawında alıp barılıp atırǵan reformalarǵa toqtalıp ótti hám de jámiyette oqıtıwshı kásibiniń abıroyın arttırıw, oqıtıwshı hám muǵallimlerdiń shárayatın jaqsılaw 2023-jıldaǵı eń tiykarǵı wazıypalarımızdın biri boladı, dep atap ótedi.
Sol sebepli, 2023-jılǵa elimizde «Insanǵa itibar hám sapalı bilimlendiriw jılı» dep at berildi. Bul óz náwbetinde alımlar, pedagoglar, ilimiy xızmetkerler, ustazlar ushın úlken bir isenim hám juwapkershilikti berdi. Bunday at beriliwi, álbette, keleshek rawajında joqarı bilimlendiriw tarawında jańadan-jańa maqsetler, jańadan-jańa wazıypalar turǵanınan derek beredi.
Mektep bilimlendiriw tarawında oqıwshılarda erkin hám kreativ pikirlewdi, toparda islewdi qáliplestiriw zárúr ekenligin atap ótti. Sonday-aq, Prezidentimiz óz sózinde «Bilimlendiriw» sózin 25 márte qollanar eken, bul házirgi kúnde bilimlendiriw tarawında jańadan ózgerisler ámelge asırılǵannan derek beredi.
Mámleketimiz basshısı, óz sóziniń juwmaǵında «Sol sebepli, qanshelli qıyın bolmasın tańlaǵan jolımızdan heshqashan artqa qaytpaymız. Gózlegen maqsetlerimizge álbette jetemiz. Bul jolda niyeti ullı, qálbi pák, miynetkesh xalqımızǵa tayanamız. Bir tán, bir jan bolıp háreket etsek, men isenemen, el-jurtımız umtılıp atırǵan Jańa Ózbekstandı álbette, bárshemiz birgelikte quramız» degen pikirleri hár bir insandı jáne óz eline sadıqlıq ruwxında jasaw kerekligin kórsetip turıptı hám bul óz náwbetinde zıyalılar alımlar, jas izertlewshiler aldında turǵan áhmiyetli wazıypaldardan biri esaplanadı.
Elmuratov Ikmatulla Gaybullaevich
«Ózbekstan hám Qaraqalpaqstan tariyxı» kafedrası baslıǵı.
