Usı jıldın 30-yanvar kúni Berdaq atındaǵı Qaraqalpaq mámleketlik universiteti Ekonomika hám Qurılıs fakultetinde «Korrupciyanıń aldın alıw hám oǵan qarsı gúresiw» atamasında ushırasıw bolıp ótti. Onda universitetimizdiń ilimiy isler boyınsha prorektor I.Turdımambetov, Korrupciyaǵa qarsı gúresiw boyınsha bólim baslıǵı K.Uteniyazov, Ekonomika hám Kurılıs fakulteti professor oqıtıwshılar hám tyutorları qatnastı.
Ushırasıwda universitet ilimiy isler boyınsha prorektorı I.Turdımambetov shıǵıp sóylep, óz sózinde universitettiń ilimiy jumısları boyınsha kórsetkishler bir qansha joqarı dárejede eknligin, sonday-aq, oqıw dáwirinde professor oqıtıwshılar arasında júz berip atırǵan unamsız jaǵdaylarǵa ayırıqsha toqtalıp ótti. Búgingi kúnde Respublika kóleminde joqarı oqıw orınlarınıń ayırım professor-oqıtıwshıları hám student jasları arasında bunday jaǵdaylar ushırasıp atırǵanlıǵı, atap aytqanda joqarı oqıw orınlarında imtixanlar dáwirinde eń awır jınayatqa qol urıp atırǵanlıǵı hám bunday unamsız is háreketlerge qol urǵan insanlardıń keleshegine tásir etip qoymastan, jámiyetke hám elimizdiń rawajlanıwınada keri tásir etetugınlıǵı haqqında aytıp ótti.
Bunnan soń, universitetimizdin Korrupciyaǵa qarsı gúresiw boyınsha bólim baslıǵı K.Uteniyazov búgingi kúnniń global mashqalalarınıń biri bolǵan korrupciyaǵa qarsı gúresiw boyınsha elimizde islenip atırǵan is ilajlar, 2016-jıl 13-dekabr kúni «Korrupciyaǵa qarsı gúresiw haqqında» ǵı Ózbekstan Respublikası nızamı (2017-jıl 3-yanvar, 419-sanlı) Senat tárepinen maqullanıp, 2017-jıl 4-yanvardan baslap kúshge engizilgenligi, sonday-aq usı nızam tiykarında bul jaman illetke qarsı elimizde bir qansha ilajlar ótkerilip atırǵanlıǵı haqqında aytıp ótti. Bul nızam 6 bap, 34 statyadan ibarat bolıp, nızamnıń maqseti korrupciyaǵa qarsı gúresiw tarawındaǵı qatnasıqlardı tártipke salıw haqqında toqtalıp ótti. Korrupciyaǵa qarsı tek ǵana jınayıy-huqıqıy qurallardı qollaw arqalı erisip bolmaytuǵınlıǵı, bul illetke qarsı gúresiwde tek ǵana mámleket organları emes bálkim jámiyet, ulıwma alǵanda hár bir puqara birdey juwapkershilik penen qatnasta bolsa, mámleket organları hám puqaralardıń hárketlerin birlestirgen halda unamlı nátiyjelerge erisiw múmkinligi haqqında ayırıqsha atap ótti.
Bunnan soń kún tártibindegi máseleler boyınsha fakultetlerdiń bir qansha professor oqıtıwshılar ózleriniń pikir hám usınısların bildirdi, sonıń menen birge barlıq professor-oqıtıwshılardı hám texnikalıq xızmetkerlerin bunday jaman illetlerden uzaq bolıwǵa shaqırıp qaldı.
Ekonomika fakulteti dekanı orınbasarı: Q. Nurmanov
