Ózbekstan Respublikası Ishki isler ministrliginiń 2023-jıl 19-yanvar kúngi 14-sanlı biyligine tiykar “Jaslar arasında náshebentlik hám psixotrop zatlardıń tarqalıwınıń aldın alıw hám oǵan qarsı gúresiw” boyınsha taraw qánigeleri qatnasıwında Qaraqalpaq mámleketlik universiteti student-jasları arasında “Náshebentlik-salamatlıq, intellekt hám rawajlanıw zawalı” atamasındaǵı úgit-násiyat ilajı bolıp ótti.
Ilajǵa Qaraqalpaqstan Respublikası Ishki isler ministrliginiń Jınayat qıdırıw basqarması náshebentlikke qarsı gúresiw bólimi aǵa operativ wákili, mayor R.Qállibekov, Nókis qalası Allaxberdi Aziz Jome meshiti imamı A.Xojasov, Respublika qánigelestirilgen narkologiya ilimiy, ámeliy medicina orayınıń Qaraqalpaqstan Respublikası aymaqlıq filialı narkolog-shıpakeri N.Dawletmuratova, barlıq fakultet tyutorlar hám student-jaslar qatnastı.
Májilisti Qaraqalpaq mámleketlik universiteti Jaslar máseleleri hám ruwxıy-aǵartıwshılıq isleri boyınsha prorektor S.Alauatdinov ashtı hám alıp bardı. Ol óz sózinde náshebentliktiń awır aqıbetleri, sonday-aq, respublikamız aymaǵında jinayatshılıqtıń aldın alıw maqsetinde alıp barılıp atırǵan is-ilajları, respublikamız aymaǵında hár jılı fevral ayında ótkeriletuǵın profilaktika nátiyjeleri haqqında keń túrde maǵlıwmatlar berdi.
Bunnan soń, sózge shıqqanlar, jaslar arasında náshebentliktiń aldın alıw ham oǵan qarsı gúresiw hám de AIJS kesselliginiń awır aqıbetleri boyınsha júrgizilip atırǵan úgit-násiyat islerine toqtap ótti. Sonday-aq, ayrım jaslarımızdıń narkotik zatlar menen baylanıslı jınyatlardı islewi hám náshebentlik jolına kirip baratırǵanlıǵı haqqında toqtalıp, joqarıda keltirip ótilgen unamsız illetlerge qarsı bárshe jaslar menen birgelikte gúresiw kerekligi aytıp ótildi. Ilaj dawamında student-jaslar ózleriniń qızıqtırǵan sorawlarına taraw qánigeleinen juwaplar aldı.
