Sanaat texnologiyası fakultetinde Student-jaslar arasında náshebentlik zatlardıń tarqalıwına qarsı gúresiw háme jınayatshılıq hám huqıqbuzarlıqtıń aldın alıwǵa qaratılǵan iláj ótkerildi. Ilájǵa Sanaat texnologiyası fakulteti dekanı R.Qurbaniyazov, dekan orınbasarı Sh.Musirov, Respublika qánigelestirilgen narkologiya ilimiy ámeliy medicina orayı Qaraqalpaqstan filialı shıpakeri U.Eshmuratov, 3-sanlı ishki isler bólimi profilaktika inspektorı kapitan A.Duysenov, QMU profilaktika inspektorı kapitan I.Erejepov, fakultet tyutorları hám student-jasları qatnasdı.
Ilajdı Sanaat texnologiyası fakulteti dekanı R.Qurbaniyazov basqarıp barıp, ol óz sózinde ilajdıń tiykarǵı maqseti student jaslar arasında unamsız jaǵdaylardıń aldın alıw, olar arasında náshebentlik zatlardıń tarqalıwına qarsı gúresiw hám jınayatshılıq hám huqıqbuzarlıqtıń aldın alıwǵa qaratılǵan is-ilájlar haqqında toqtalıp ótti.
Bunnan soń, Respublika qánigelestirilgen narkologiya ilimiy ámeliy medicina orayı Qaraqalpaqstan filialı shıpakeri U.Eshmuratov sózge shıǵıp óz sózinde jaslar arasında narkotik zatlarınıń tarqalıwına qarsı gúresiw, student-jaslar náshebentlikke berilmewin, narkotik zatlarınıń zıyanı, ayanıshlı hám awır aqıbetler haqqında, bul jaman illetlerdiń aldın alıw maqsetinde respublika jaslarınıń salamatlıǵın kúsheytiw, barkamal insan etip tárbiyalawǵa qaratılǵan ilajlar haqqında aytıp, Náshebentlik bul jawızlıq ekenin onnan qutılıb shıǵıw qıyın isligi, bunıń áqıbetinde kóplegen shańaraqlar ajıralıwına, ele tuwılmaǵan gódeklerdi keleshekte mayıp bolıp qalıwına, jaslardı ómirine zawal bolıp atırǵanlıǵı anıq mısallar menen aytıp ótti. Sonıń menen birge, nápsin jılawlay almaǵan ayrım birewler shıdamlılıǵı bos, náshebentlikke beyimi bar jaslardı túrli jollar menen torına ilindirip paydalanıwı, sol sebepli, bunday illetke qarsı gúresiw ushın házirde xalıq arasında, shańaraq, mektep, máhelle, tiyisli shólkemler hám de keń jámiyetshilik birgelikte úzliksiz túsindiriw jumısları alıp barılıwı búgingi kúnde tiykarǵı máselelerimiz ekenligin atap ótti.
Sonday-aq, 3-sanlı ishki isler bólimi profilaktika inspektorı kapitan A.Duysenov, QMU profilaktika inspektorı kapitan I.Erejepovlar sózge shıǵıp házirgi waqıtları jaslar arasında júz berip atırǵan huqıqbuzarlıqlar haqqında aytıp, olardıń kelip shıǵıw sebepleri hám jámiyetke keri tásiri haqqında keń túsinik berip ótti. Sonday-aq, korrupciya menen baylanıslı jınayatlarǵa aralasıp qalmawları kerekligi, sońǵı waqıtlarda korrupciyaǵa tek ǵana lawazımlı shaxslar, oqıtıwshılar emes hátte student jaslarda bilip-bilmey aralasıp qalıp atırǵanlıǵın, bunıń aqıbeti jaqsılıqqa alıp kelmewi haqqında túsindirip ótti. Bunnan tısqarı jaslar bos waqıtların mazmunlı ótkeriw ushın hár qıylı pán hám sport dógereklerine qatnasıw kerekligi, házirgi dáwirde jer júzinde júz berip atırǵan ayrıqsha jaǵdaylardan sergek bolıp hár qıylı huqıqbuzarlıqlardan awlaq bolıwları kerekligi haqqında bunday jınayat hám huqıqbuzarlıqlarǵa ámeldegi nızamshılıǵımızda juwapkershilik bar ekenligi haqqında student jaslarǵa túsindirildi. Iláj sońında studentler ózleriniń qızıqtırǵan sorawların berip tiyisli juwaplar aldı.
